નવસારીના જલાલપોર અબ્રામા ગામ આશ્રમ ફળિયાના એક મકાનમાં તસ્કરોએ ત્રાટકી લાખો રૂપિયાના સોનાના દાગીનાની ચોરી કરી ફરાર થઈ ગયાની ફરીયાદ જલાલપોર પોલીસ સ્ટેશનમાં નોંધાઈ હતી. મળતી માહિતી મુજબ, નયનકુમાર મોહનલાલ પટેલ (રહે.આશ્રમ ફળિયા, અબ્રામા, તા.જલાલપોર, નવસારી)ના ટેલરીંગનું કામ કરી પરિવારનું ગુજરાન ચલાવે છે.

તા.૨૩મી જાન્યુઆરીના રોજ તેઓ મુંબઈ ખાતે રહેતા પિતાજીનું અવસાન થતા પરિવાર સાથે મુંબઇ ગયા હતાં અને જેમની ૨૫મી ના રોજ બારમાની વિધિ પતાવીને તેઓ ૨૬મી નારોજ સાંજે પરત ઘરે આવતા તેમના દરવાજાનું તાળુ તુટેલું જોવા મળ્યું હતું. અંદર જઈ તપાસ કરતા તસ્કરોએ કબાટને તોડી તેમાં મુકેલ સોનાના દાગીના સવા સાત તોલા તેમજ ચાંદીના સિક્કા, ચાંદીની મૂર્તિ અને રોકડા રૂા.૫૦ હજાર મળી લાખો રૂપિયાની ચોરી કરી નાશી છૂટ્યા હતાં. તસ્કરોએ મકાનમાં ચોરી કરતી વખતે ફ્રીઝમાં રહેલ ખાવાની ચીજ વસ્તુઓ પણ ઓહયા કરી ગયા હતાં. બનાવ અંગે નયનભાઈ પટેલે જલાલપોર પોલીસ સ્ટેશનમાં ફરીયાદ નોંધાવતા પોલીસે અજાણ્યા ઈસમો સામે ચોરીનો ગુનો દાખલ કરી વધુ તપાસ હાથ ધરી હતી.