સેલવાસ પોલીસની ક્રાઈમ બ્રાન્ચે ૫.૦૦૭ કિલોગ્રામ ગાંજો જપ્ત કરી બે આરોપીઓની ધરપકડ કરી હતી. ક્રાઈમ બ્રાન્ચને બાતમી મળી હતી કે ઉત્તર પ્રદેશથી નશીલા પદાર્થ ગાંજાની સપ્લાય આવી રહી છે. અને બે વ્યક્તિઓ વાપી રેલવે સ્ટેશનથી હિરવા વન ગાર્ડન, પીપરીયા, સિલવાસા નજીક સાંજના સમયે ગાંજો લઈને આવવાના છે. આ માહિતીના આધારે પોલીસની ટીમે તાત્કાલિક કાર્યવાહી કરી હિરવા વન ગાર્ડન વિસ્તારમાં વોચ ગોઠવી હતી.

આ સમયે બાતમી મુજબના સ્થળે બે શંકાસ્પદ વ્યક્તિઓને એક બેગ સાથે જોતાં તેમને રોકી તપાસ કરતા બેગમાંથી ૫.૦૦૭ કિલોગ્રામ ગાંજો મળી આવ્યો હતો. પકડાયેલા આરોપીઓમાં ઉત્તર પ્રદેશના જૌનપુરના રહેવાસી ૨૦ વર્ષીય આશિષકુમાર ચંદ્રપ્રકાશ કુમાર અને તેના સાથી ૨૦ વર્ષીય સૌરભ વિશ્વકર્મા (પિતા કુંજ બિહારી)નો સમાવેશ થાય છે. પોલીસે આ કેસમાં NDPS એક્ટની કલમ હેઠળ ગુનો નોંધ્યો છે. આરોપીઓ પાસેથી ૫.૦૦૭ કિલોગ્રામ ગાંજો, બે મોબાઈલ ફોન, બે બેગ અને ગાંજાની પેકિંગ માટે વપરાયેલી બ્રાઉન ટેપ સાથેની પ્લાસ્ટિકની થેલી જપ્ત કરવામાં આવી છે. પોલીસ તપાસમાં ગાંજાનું સપ્લાય નેટવર્ક અને અન્ય સંડોવાયેલા આરોપીઓ વિશે માહિતી મેળવવા પ્રયાસ થઈ રહ્યો છે.