બનાવટી મેડિકલ ફિટનેસ સર્ટિફિકેટના આધારે આણંદની આરટીઓમાંથી ડ્રાઈવિંગ લાઈસન્સ કઢાવવાનું કૌભાંડ આચરનારા પિતા- પુત્રને આણંદ એસઓજીએ ઝડપી પાડયા છે. બંને શખ્સો મેડિકલ ઓફિસરના બનાવટી સહી- સિક્કા કરી કૌભાંડ આચરતા હતા.

આણંદ શહેરની બેડવા સ્થિત આરટીઓ કચેરીના મુખ્ય દરવાજા બહાર ગાડીમાં આણંદની સામરખા ચોકડીના સાંભોળપુરાના પિતા- પુત્ર આણંદ આરટીઓ કચેરી ખાતે ડ્રાઇવિંગ લાઇસન્સ રીન્યુ કરવા માટેના મેડિકલ ફિટનેસ સટફિકેટ ઉપર મેડિકલ ઓફિસરના ગેરકાયદે બનાવટી સહી સિક્કા જાતે કરી તૈયાર કરાવી ડ્રાઇવિંગ લાઇસન્સ રીન્યુ કરાવતા હોવાની બાતમી પોલીસને મળી હતી. આણંદ એસઓજી પોલીસની ટીમે આરટીઓ કચેરીના ગેટ બહાર રેડ કરતા ગાડી પાસેથી બે શખ્સો પકડાયા હતા. પૂછપરછમાં તે રિઝવાન મુસ્તફાભાઈ વ્હોરા અને રાહિલભાઈ રિઝવાન ભાઈ વ્હોરા બંને રહે. સામરખા તાબે સાદાનાપુરા સાંભોળપુરાવાળા હોવાનું અને પિતા- પુત્ર હોવાનું જણાવ્યું હતું. 

પોલીસે સ્થળ ઉપર તપાસ કરતા તેમની પાસેથી મેડિકલ ઓફિસરના બનાવટી સ્ટેમ્પ તથા બનાવટી સહી સિક્કાથી તૈયાર કરેલા ૨૪ નંગ મેડિકલ ફિટનેસ સટફિકેટો તેમજ સહી- સિક્કા વગરના ત્રણ મળી આવ્યા હતા. પોલીસે અલગ અલગ રબર સ્ટેમ્પ, ડ્રાઇવિંગ લાઇસન્સ, આરસીબુક, મેડિકલ ફિટનેસ સટફિકેટ, લેપટોપ, પ્રિન્ટર ઇન્વર્ટર તથા એક ગાડી મળી કુલ રૂપિયા ૮૫ હજારનો મુદ્દામાલ કબજે લઈ બંનેને આણંદ ગ્રામ્ય પોલીસના હવાલે કર્યા હતા. આણંદ ગ્રામ્ય પોલીસે બંને શખ્સો વિરુદ્ધ ગુનો નોંધી વધુ તપાસ હાથ ધરી છે. આણંદ એસોજી પોલીસ દ્વારા બનાવટી મેડિકલ ફિટનેસ સટફિકેટ ના આધારે ડ્રાઇવિંગ લાઇસન્સ કઢાવવાના આ કૌભાંડમાં અન્ય કોઈ એજન્ટોની સંડોવણી તથા આરટીઓ કચેરીના કોઈ અધિકારી કે કર્મચારીઓની સંડોવણી અંગે ઊંડાણપૂર્વક ની તપાસ શરૂ કરવામાં આવી છે.