છેલ્લા એક સપ્તાહથી સુરત સહિત સમગ્ર દક્ષિણ ગુજરાતને ઘમરોળનાર મેઘરાજાએ આજે વહેલી સવારથી વિરામના મુડમાં નજરે પડ્યા છે. ગઇકાલ બાદ આજે પણ સવારથી શહેરના છુટાછવાયા વિસ્તારોમાં વરસાદી ઝાપટાં સિવાય મોટા ભાગના વિસ્તારોમાં વાદળોની અવર-જવર વચ્ચે વરસાદે વિરામ લીધો હતો. બીજી તરફ કોઝવેની સપાટી પણ ૩૪૦.૦૪ ફુટે પહોંચી છે. હાલ ઉકાઇ ડેમના ઉપરવાસમાં વરસાદના અભાવ વચ્ચે ઇનફલો ૪૦ હજારે પહોંચ્યો છે. જેની સામે ૨૨ હજાર ક્યુસેક પાણી તાપી નદીમાં છોડવામાં આવી રહ્નાં છે. હવામાન વિભાગ દ્વારા સપ્ટેમ્બર મહિનાના અંતિમ સપ્તાહ સુધી ભારે વરસાદની આગાહી વચ્ચે આજે વહેલી સવારથી શહેરના વરાછા ઝોન-એમાં ત્રણ મીમી, ઉધનામાં બે મીમી વરસાદ નોંધાયો હતો. આ સિવાય તાલુકાઓમાં બારડોલીમાં બે મીમી, ઓલપાડમાં નવ મીમી અને વાલોડમાં બે મીમી વરસાદ પડ્યો છે. અલબત્ત, અન્ય તમામ તાલુકાઓમાં વરસાદે વિરામ લીધો હતો.