સુરત જિલ્લા એલ.સી.બી.ની ટીમે શનિવારે મોડી રાતે પલસાણાનાં જોળવાના ખેતરાડી વિસ્તારમાં રિક્ષામાં કાર્ટિંગ થતા રૂપિયા 1.76 લાખનો વિદેશી દારૂ ઝડપી પાડી કિશોરને તાબામાં લીધો હતો પોલીસે ઘટના સ્થળેથી 2.31 લાખનો મુદામાલ કબ્જે કરી કાર્યવાહી હાથ ધરી હતી. મળતી માહિતી અનુસાર, એલ.સી.બી શાખાના માણસો પ્રોહી જુગારની પ્રવૃતીને નાબુદ કરવા બાબતે અલગ અલગ ટીમો બનાવી પેટ્રોલીંગમાં હતા.

તે દરમિયાન એલ.સી.બી શાખાનાને ખાનગી રાહે બાતમી મળેલ હતી કે, જોળવા ગામની હદમાં ગૌચર ફળીયાની પાછળ ગૌચરની જમીનમાં ઝાડી ઝાંખરામાં જોળવા ખાતે રહેતો પુષ્પેન્દ્રસિંગ ઉર્ફે ફુલન તથા તેનો મિત્ર અખીલેશ ઉર્ફે પીન્કેશ શુક્લા (રહે.કડોદરા, પ્રિયંકા ગ્રીનસીટી,પલસાણા) નાઓએ ભારતીય બનાવટનો વિદેશી દારૂનો જથ્થો મોટા પ્રમાણમાં ઉતારી રાખેલ છે અને ઓટો રીક્ષાઓમાં ભરીને સગેવગે કરનાર છે. જે બાતમીના આધારે સ્થળ ઉપર રેઇડ કરતા પોલીસને કાયદાના સંઘર્ષમાં આવેલ કિશોર મળી આવેલ હતો તેમજ અન્ય આરોપી અંધારાનો લાભ લઈ નાશી ગયા હતા.

જોકે, પોલીસે કિશોરને તાબામાં લઇ ઘટના સ્થળેથી વિદેશી દારૂની જુદી જુદી બ્રાન્ડની બાટલી તથા ટીન બીયર મળી કુલ 1,456 નંગ બોટલો મળી આવી હતી જેની કિંમત રૂપિયા 1,76,800/- તેમજ રીક્ષા જીજે/19/ડબ્લ્યુવી/1440 અને મોબાઈલ મળી કુલ રૂપિયા 2,31,800/-નો મુદ્દામાલ કબ્જે કરી કાયદાના સંઘર્ષમાં આવેલ કિશોરને તાબા હેઠળ લઈ વોન્ટેડ આરોપી પુષ્પન્દ્રસિંગ ઉર્ફે ફુલન (રહે.જોળવા), અખીલેશ ઉર્ફે પીન્કેશ આત્મનારાયણ શુક્લા (રહે.કડોદરા, પ્રિયંકા ગ્રીનસીટી, પલસાણા), રાહુલ પરમાર (રહે.કડોદરા, શ્રીનિવાસ રેસીડન્સી,પલસાણા) અને વિક્રમ ઉર્ફે વિરૂ રાજપુત નાને વોન્ટેડ જાહેર કરી વધુ તપાસ હાથ ધરી હતી.