ગણદેવી પોલીસે નેશનલ હાઈવે નંબર-૪૮ ઉપર મેંગોનીઝવીલા સામે વોચ ગોઠવી હતી. તે દરમિયાન નાકાબંધી તોડી ભાગેલી કારનો ફિલ્મી ઢબે ૧૯ કિ.મી પીછો કરી ઝડપી હતી. જેમાંથી રૂપિયા ૨,૫૫,૧૪૦/-ની ૬૮૬ બોટલ, રૂપિયા ૧૦ લાખની કાર, એક નંગ મોબાઈલ મળી કુલ્રુપિયા ૧૨,૫૫,૬૪૦/-નો મુદ્દામાલ કબ્જે લીધો હતો.

ગણદેવી પોલીસ સ્ટાફનાં માણસો પેટ્રોલિંગમાં હતી તે સમયે બાતમી મળી હતી કે, એક સફેદ રંગની કીયા સેલટોસ કાર નંબર જીજે/૨૧/સીસી/૬૧૬૯માં વિદેશી દારૂ ભરી વલસાડ તરફથી હાઇવે માર્ગે સુરત તરફ જનાર છે. જે બાતમી આધારે પોલીસે એંધલ મેંગોનીઝ વીલા સામે વોચ ગોઠવી હતી. તે દરમિયાન બાતમી વાળી કાર આવતા તેને ઉભી રાખવાની કોશિષ વચ્ચે ચાલક પુરઝડપે ચીખલી તરફ હંકારી ગયો હતો.

પોલીસે ફિલ્મી ઢબે પીછો કરતા ચીખલી-બીલીમોરા માર્ગથી ફંટાઈને નાંદરખા ગામ થઈ કરંજદેવી ચાર રસ્તા ૧૯ કિ.મી પીછો કર્યો હતો. જ્યાં કાર ચાલકે સ્ટેરીંગ ઉપરનો કાબુ ગુમાવતા જીઈબીના વીજપોલ સાથે ટકરાઈ હતી. પોલીસે કાર ચાલક હિતેશ મધુસુદન રાણા (ઉ.વ.૩૯., રહે.ખોડિયાર નષર, ભાઠેના, ઉધના)ને ઝડપી લીધો હતો અને કારની તપાસ કરતા તેમાંથી વિદેશી દારૂની બોટલ નંગ ૬૮૬ જેની કિંમત રૂપિયા ૨,૫૫,૧૪૦/-, કાર કિંમત રૂપિયા ૧૦ લાખ મળી કુલ રૂપિયા ૧૨,૫૫,૬૪૦/-નો મુદ્દામાલ કબ્જે કર્યો હતો. આમ, માલ મંગાવનાર અને ભરાવનારને વોન્ટેડ જાહેર કરી આગળની વધુ કાર્યવાહી હાથ ધરી હતી.