ભરૂચનાં અંકલેશ્વર નજીક હાઇવે પર ટ્રકમાં ઊનની આડમાં લઈ જવાતો રૂપિયા ૭૦ લાખથી વધુની કિંમતનો વિદેશી દારૂનો જથ્થો સ્ટેટ મોનિટરિંગ સેલની ટીમે ઝડપી પાડયો હતો. સ્ટેટ મોનિટરિંગ સેલની ટીમે અંકલેશ્વર નજીક હાઇવે પર આવેલ મૂલડ ટોલ પ્લાઝા નજીક વોચ ગોઠવી હતી.

તે દરમિયાન ટ્રક આવતા તેને રોકી તપાસ કરતા અંદરથી ઉનનો જથ્થો મળી આવ્યો હતો જોકે તપાસ કરતા ઉનની આડમાં લઈ જવાતો વિદેશી દારૂનો મોટો જથ્થો મળી આવ્યો હતો. આમ, પોલીસે ટ્રકમાંથી રૂ.૭૦.૩૯ લાખની કિંમતનો વિદેશી દારૂ કબજે કર્યો હતો. પોલીસે ટ્રક ચાલક અને રાજસ્થાનનાં રહેવાસી પીન્ટુ સિંહ નટુસિંગ રાવતની ધરપકડ કરી તેની પૂછપરછ કરતા તે દારૂનો જથ્થો ગોવાથી લાવ્યો હતો અને કચ્છના ગાંધીધામ પહોંચાડવાનો હોવાનું બહાર આવ્યું હતું. પોલીસે આ મામલામાં કુલ ૪ આરોપીઓને વોન્ટેડ જાહેર કર્યા હતા. જયારે ટ્રક, મોબાઈલ અને રોકડ રકમ મળી કુલ રૂ.૯૦. ૭૯ લાખનો મુદ્દામાલ જપ્ત કરી કાર્યવાહી હાથ ધરી હતી.