તાપી જિલ્લાનાં કુકરમુંડા વેલદા તરફ જતા રસ્તા પર કુકરમુંડા ગામની સીમમાં રાત્રિના સમયે મહારાષ્ટ્ર એસ.ટી. નિગમ રીપેરીંગ માટેનું વાહન નંબર એમડબ્લ્યુપી/4622નો ચાલક અનીલ ગુલાબરાવ મેઘરામ દ્વારા પોતાના કબ્જાનું વાહન પુરઝડપે અને ગફલતભરી રીતે કુકરમુંડાથી વેલદા તરફ જતા રસ્તા ઉપર હંકારી લાવી રોડ પર અચાનક જમણી સાઈડ વળાંક લઈ લેતા પાછળથી આવતી એક બાઈક નંબર જીજે/06/એફઈ/5194 બસની પાછળ અથડાઈ હતી. આ ઘટનામાં બાઈક ચાલક સંપતભાઈ દાજ્યાભાઈ ઠાકરે અને તેનો મિત્ર એવા વિઠ્ઠલભાઈ ધર્માભાઈ તડવીને માથામાં અને શરીરે ગંભીર ઈજા થતા સંપતભાઈ સ્થળ પર જ મોત થયું હતું, જયારે વિઠ્ઠલભાઇને સારવાર માટે નિઝર સરકારી દવાખાને લઈ જવામાં આવતા તેમનું સારવાર દરમિયાન મોત નીપજ્યું હતું.

આ બંને મિત્રો મહારાષ્ટ્રના નંદુરબાર ખાતેની હોસ્પિટલમાં કોઈ કામકાજ અર્થે જવા નીકળ્યા હતા. બનાવ અંગે મરણ જનાર સંપતભાઈના મોટા ભાઈ દ્વારા મહારાષ્ટ્ર રાજ્યની એસ.ટી. નિગમની બસ રીપેરીંગ વાહન ચાલક સામે નિઝર પોલીસ સ્ટેશનમાં નોંધવામાં આવી હતી.