વિવિધ બજારોમાં ખરીફ સિઝનની નવી ડુંગળીની આવક શરૂ થઈ ગઈ છે. જેના કારણે ડુંગળીનાં ભાવમાં ઘટાડો નોંધાયો છે. સ્ટોક કરેલી ડુંગળીનાં વેચાણમાં થયેલા વધારાથી પણ ભાવમાં નરમાઈને વેગ મળ્યો. સપ્તાહ દરમિયાન મુખ્ય ઉત્પાદક રાજ્ય મહારાષ્ટ્રની લાસણગાવ મંડીમાં ડુંગળીનાં ભાવ રૂપિયા 800-2800થી ઘટીને રૂપિયા 600-2200 અને દિલ્હીનાં આઝાદપુર મંડીમાં રૂપિયા 700-2700થી રૂપિયા  625-2250 પ્રતિ ક્વિન્ટલ થયા છે. દિલ્હીનાં રીટેલ બજારમાં ડુંગળીની સરેરાશ કિંમત એક સપ્તાહમાં 38 રૂપિયાથી ઘટીને 30 રૂપિયા અને મુંબઈમાં 39 રૂપિયાથી ઘટીને 37 રૂપિયા પ્રતિ કિલો થઈ ગઈ છે.

ઇન્ડિયન વેજીટેબલ પ્રોડક્યુસર્સ એસોસિએશને જણાવ્યું હતું કે, નવી ખરીફ ડુંગળી બજારમાં આવવા લાગી છે. આ સાથે ભાવ વધારાને કારણે ખેડૂતો અને વેપારીઓએ સ્ટોક કરેલી ડુંગળી વેચવાનો આગ્રહ રાખ્યો હતો. આવી સ્થિતિમાં છેલ્લા કેટલાક દિવસો દરમિયાન બજારમાં ડુંગળીનાં ભાવમાં ઘટાડો થયો છે. બીજી તરફ ખરીફ સિઝનમાં ડુંગળીના ઉત્પાદનમાં ઘટાડો થવાની ધારણા છે. આવી સ્થિતિમાં જો સ્ટોક કરેલી ડુંગળીનું દબાણ ઘટશે તો ડુંગળીના ભાવ ફરી વધી શકે છે. ડુંગળીનાં વેપારીઓએ જણાવ્યું કે, હલકી ગુણવત્તાવાળી ડુંગળીના ભાવ વધુ નીચે આવ્યા છે.