પુણા પાટીયા અભિષેક રેસીડેન્સીમાં રહેતા વેપારી સાથે મકાનના નામે રૂપિયા ૨૪.૭૯ લાખની ઠગાઈ થઈ છે. પડોશી અગ્રવાલ પિતા-પુત્રઍ મકાનના પૈસા પડાવી લીધા બાદ દસ્તાવેજ બનાવી નહી આપી વતન રાજસ્થાન ભાગી ગયા હતા. પોલીસે વેપારીની ફરિયાદ લઈ તપાસ શરુ કરી છે.

પુણા પોલીસના જણાવ્યા મુજબ પુણા પાટીયા અભિષેક રેસીડેન્સીમાં રહેતા હરીશભાઈ દેવારામ પરીહાર(ઉ.વ.૩૨) વેપાર ધંધા સાથે સંકળાયેલા છે. હરીશભાઈએ ગઈકાલે અભિષેક રેસીડેન્સીમાં જ રહેતા અભિનવ જવાહરલાલ અગ્રવાલ અને તેના પિતા જવાહરલાલ અગ્રવાલ સામે ફરિયાદ નોધાવી હતી. જેમાં હરીશભાઈએ જણાવ્યું હતું કે આરોપી અગ્રવાલ પિતા-પુત્રએ સન ૨૦૧૭માં તેમના ફ્લેટનો સોદો કરી સાટાખત કરી આપ્યા હતા. મકાન પર લોન ચાલતી હોવાથી આરોપીઓએ શરૂઆતમાં હરીશભાઈ પાસેથી લોનના બેન્કમાં જમા કરવાના બહાને રૂપિયા ૧૫,૫૦,૦૦૦ પડાવી લીધા હતા જોકે પૈસા બેન્કમાં જમા નહી કરાવી પોતાના અંગત કામોમાં વાપરી નાંખ્યા બાદ બાકી હપ્તા ટુકડે-ટુકડે કરી રૂપિયા ૯,૨૯,૯૯૬ બેન્કમાં ભરાવડાવ્યા હતા. આ રીતે અગ્રવાલ પિતા-પુત્રએ કુલ રૂપિયા ૨૪,૭૯,૯૯૬ પડાવી લીધા બાદ મકાનનો દ્સ્તાવેજ કરી નહી આપી  પોતાના વતન રાજસ્થાન ભિલવાડા ખાતે નાસી ગયો હતો. બનાવ અંગે પોલીસે હરીશભાઈની ફરિયાદ લઈ અગ્રવાલ પિતા-પુત્ર સામે ગુનો દાખલ કરી તપાસ હાથ ધરી છે.