વલસાડના અબ્રામા ધારાનગર સોસાયટીના ગેટ પાસે આવેલા ભંગારના ગોડાઉનમાં આગ લાગતા નજીકમાં આવેલી એપાર્ટમેન્ટમાં રહેતા લોકોમાં ભાગદોડ મચી ગઇ હતી. પાલિકાની ફાયરની ટીમે આગને કાબુમાં લેતાં લોકોએ રાહત અનુભવી હતી. વલસાડ શહેરના અબ્રામા વિસ્તારના ધારાનગર સોસાયટી બહારના ગેટ પાસે ભાગે ભંગારનું ગોડાઉન આવેલું છે.

જયારે શનિવારે બપોરે ભંગારના ગોડાઉનમાં અચાનક આગ લાગતા લોકોમાં ભાગદોડ મચી ગઈ હતી અને આગ બાજુમાં આવેલ એપાર્ટમેન્ટમાં નહીં પહોંચે તે માટે આગને બુઝાવવા સ્થાનિક લોકો દ્વારા પાણીનો મારો ચલાવી આગ ઉપર કાબુ મેળવવાનો પ્રયાસ કર્યો હતો. પરંતુ આગ વધુ વિકરાળ બનતા વલસાડ નગરપાલિકા ફાયર બ્રિગેડની ટીમને જાણ કરતા તેઓ તાત્કાલિક ઘટના સ્થળે દોડી આવી પાણીનો મારો ચલાવી આગને કાબુમાં લીધી હતી. આગની ઘટનાની જાણ થતા વલસાડ સીટી પોલીસ પણ દોડી ગઈ હતી.