બોલીવુડ એક્ટર ઋષિ કપૂર અને રણધીર કપૂરના ભાઈ રાજીવ કપૂરનું 9 ફેબ્રુઆરી મંગળવારના રોજ બપોરે હાર્ટ-એકટે આવવાથી નિધન થયું છે. 58 વર્ષીય રાજીવ કપૂરને ચેમ્બુરમાં તેમના ઘરની નજીકની હોસ્પિટલમાં લઇ જવામાં આવ્યા હતા, જ્યાં ડોક્ટરો એ તેમને મૃત જાહેર કર્યા હતા. જ્યારે ઋષિ કપૂરની પત્ની નીતૂ કપૂરે તેમના સોશિયલ મીડિયા એકાઉન્ટમાં પોસ્ટ કરી આ સમાચારની પુષ્ટી કરી છે.

 

 

 

રાજીવ કપૂરે હિન્દી સિનેમામાં અભિનેતા, પ્રોડ્યૂસર અને નિર્દેશક તરીકે કામ કર્યું હતું. શમ્મી કપૂર અને શશિ કપૂર રાજીવના કાકા હતા. રાજીવ કપૂરના કરિયરનાં શરૂઆતની વાત કરી એ તો, તેમણે વર્ષ 1983માં રિલીઝ થયેલી ફિલ્મ ‘એક જાન હે હમ’થી સિલ્વર સ્ક્રીન પર અભિનેતા તરીકે ડેબ્યૂ કર્યું હતું. ત્યારબાદ વર્ષ 1985માં રિલીઝ થયેલી ફિલ્મ ‘રામ તેરી ગંગા મેલી’માં રાજીવે લીડ રોલ પ્લે કર્યો હતો. રાજીવ કપૂરએ રામ તેરી ગંગા મેલી અને બાકી ઘણી ફિલ્મોમાં કામ કર્યું હતું. રાજીવ કપુની પોપ્યુલર ફિલ્મોમાં આસમાન, લવર બોય, જબરદસ્ત અને હમ તો ચલે પરદેશ જેવી ફિલ્મો સામેલ છે.

 

 

 

દિગ્ગજ બોલીવુડ સિંગર લતા મંગેશકરે ટ્વિટર પર ટ્વીટ કરી રાજીવ કપૂરના નિધન પર શોક વ્યક્ત કર્યો છે. લતા મંગેશકરે તેમના ટ્વીટમાં લખ્યું, ‘મને અત્યારે જાણવા મળ્યું કે, રાજ કપૂર સાહેબનાં નાના પુત્ર, ગુણી અભિનેતા રાજીવ કપૂરનું આજે નિધન થયું છે, સાંભળીને દુ:ખ થયું, ઇશ્વર તેમની આત્માને શાંતિ આપે તેવી મારી પ્રાર્થના છે.’ લતાના ટ્વીટ પર તમામ ફેન્સે પણ રાજીવ કપૂરની આત્માને શાંતિની પ્રાર્થના કરી છે.