વલસાડના તિથલ રોડ ઉપર આવેલા 2 એપાર્ટમેન્ટનાં પાર્કિંગમાં પાર્ક કરેલી 5 કાર માંથી કાર ટેપ ચોરી જવાની ઘટના સામે આવી છે. આ કારમાંથી સાગમટે કારટેપ એક જ રાતમાં ચોરાઇ જતાં પોલીસ જાણ કરવામાં આવી હતી. બનાવની વિગત એવી છે કે, વલસાડના પોશ વિસ્તાર તિથલ રોડ ઉપર આવેલા સિધ્ધિ એપાર્ટમેન્ટ અને સંસ્કાર રો-હાઉસમાં પાર્કિગમાં વાહનો પાર્ક કરાયા હતા. જેમાં ગતરોજ રાત્રીના  સમયે એપાર્ટમેન્ટમાં પાર્ક કરેલી 5 કારના માલિકોએ સવારે જોતાં કાર માંથી કાર ટેપ કાઢીને કોઇ અજાણ્યો ચોર ઇસમો ચોરી ગયા હોવાનું માલૂમ પડ્યું હતું જેને લઇ સોસાયટીમાં ચકચાર મચી ગઇ હતી.જોકે કાર ટેપ ચોરી કરતી ટોળકી ફરી સક્રિય થઇ હોવાની પ્રતિતી લોકોને થઇ હતી આ મામલે રહીશોએ પોલીસને જાણ કરી હતી. પોલીસે 15 દિવસ અગાઉ પણ વલસાડના સ્વર્ગાશ્રમ મંદિર રોડ પર આવેલી રાજેશ્વરી અને મધુબન સોસાયટીમાં કેટલાક શંકાસ્પદ ઇસમો રેકી કરતા હોવાના દશ્યો સીસીટીવી કેમેરામાં કેદ થઇ ગયા હતા. જેની સોસાયટીના રહીશો દ્વારા પોલીસને મૌખિક જાણ કરવામાં આવી હતી. ત્યારબાદ ગતરોજ તિથલ રોડના સિધ્ધિ એપાર્ટમેન્ટ અને સંસ્કાર રો-હાઉસ સોસાયટીના પાર્કિંગમાંથી 5 કારના કાર ટેપની ચોરીની ઘટના સામે આવી હતી.