અંકલેશ્વરનાં ગડખોલ પાટિયા ઓવર બ્રિજ પરથી પોલીસે બાતમીનાં આધારે ગેરકાયદેસર પશુ ભરેલ ટ્રક સાથે બે ઈસમોને ઝડપી પાડ્યા હતા. જયારે ઘટનામાં એક ભેંસનું બચ્ચુ મરણ પામ્યું હતું. સુત્રો પાસેથી મળતી માહિતી અનુસાર, અંકલેશ્વર પોલીસ સ્ટાફ પેટ્રોલિંગમાં હતો. તે દરમિયાન બાતમીના આધારે પોલીસે ગળખોલ પાટિયા ઓવરબ્રિજ પાસે વોચ ગોઠવી હતી. તે સમયે શંકાસ્પદ ટ્રક આવતા પોલીસે તેને અટકાવી હતી. આમ, પોલીસે ટ્રક નંબર GJ/24/U/5528ની તપાસ હાથ ધરી હતી જેમાં પોલીસે ટ્રકમાંથી તાડપત્રી હટાવી જોતા તેમાં ક્રૂરતા પૂર્વક ઘાસચારા અને પાણીની સગવડ નહી કરી 16 પશુઓને બાંધ્યા હોવાનું જણાઈ આવ્યું હતું.

બનાવ અંગે પોલીસે ટ્રકનાં ચાલકને પશુઓ અંગે પુછપરછ કરતા પાટણથી સુરત ખાતે લઇ જતા હોવાનું જણાવ્યું હતું. આમ, પોલીસે 15 પશુઓને મુક્ત કરાવ્યા હતા અને એકનું ભેંસનું બચ્ચું મરણ પામેલ હાલતમાં મળી આવ્યું હતું. પોલીસે રૂપિયા 2.12 લાખના પશુઓ અને ટ્રક મળી કુલ 12 લાખથી વધુનો મુદ્દામાલ કબ્જે કર્યો હતો અને પાટણ ખાતે રહેતો ટ્રક ચાલક વાઘુ ઠાકોર અને અશોક માજીરાનાને ઝડપી પાડી વધુ તપાસ હાથ ધરી હતી.