બારડોલીના ગાંધી રોડ પર આવેલી ખાનગી હોસ્પિટલમાં સારવાર માટે આવતાં દર્દીના સગાઓ જાહેર રસ્તા પર વપરાયેલા હેન્ડ ગ્લોવઝ, માસ્ક અને એંઠવાડ નાંખતા સ્થાનિક રહીશો રોષે ભરાયા હતા અને સ્થાનિક નગરસેવકો સાથે હોસ્પિટલના ડોક્ટરને રજુઆત કરવા જતાં ડોક્ટરે ઉદ્ધતાઈભર્યું વર્તન કરી ડોક્ટર સ્થળ પરથી જતા રહ્યા હતા.

 

 

 

 

 

બારડોલીના ગાંધી રોડ પર આવેલી ગ્રીન એપલ હોસ્પિટલની ગંભીર બેદરકારી સામે આવી છે. હોસ્પિટલમાં કોરોનાના દર્દીઓ સારવાર લઈ રહ્યા હોય દર્દીના સગા-સંબંધીઓની પણ મોટી સંખ્યામાં અવર-જવર રહે છે. હોસ્પિટલમાં પાર્કિંગની સુવિધા નહીં હોવાથી લોકો રસ્તામાં જ વાહનો પાર્ક કરતા આસપાસના રહીશોને દરરોજ મુશ્કેલી પડી રહી છે અને દર્દીના સગા-સંબંધીઓ વપરાયેલા હેન્ડ ગ્લોવઝ અને માસ્ક હોસ્પિટલની કચરાપેટીમાં નાંખવાની જગ્યાએ બહાર જાહેર રોડ પર ફેંકી દે છે. આ બધો વેસ્ટ સોસાયટીના આંતરિક રસ્તાઓ પર ભેગો થાય છે. જેના કારણે સોસાયટીના રહીશોમાં કોરોના સંક્રમણની દહેશત ઉભી થઇ રહી છે.

 

 

 

 

 

સ્થાનિક રહીશોએ હોસ્પિટલના ડો.ભાવિનકાન્ત ચૌધરીને રજુઆત કરી હતી. પરંતુ આ કચરાના નિકાલ માટે કોઈ વ્યવસ્થા કરવામાં નહીં આવતાં રહીશોએ સ્થાનિક નગરસેવકોને રજુઆત કરી હતી. આથી નગરસેવકોએ હોસ્પિટલ જઇ ડોક્ટરને કાળજી લેવા સૂચના આપી હતી. પરંતુ ડોક્ટરે તેઓ સાથે ઉદ્ધતાઈભર્યું વર્તન કર્યું હતુ અને આ મારી જવાબદારી નહીં હોવાનું જણાવી જતા રહ્યા હતા. સ્થાનિકોના જણાવ્યા મુજબ હોસ્પિટલના કારણે ઉભી થતી સમસ્યા અંગે વહીવટી તંત્રને અનેક વખત રજુઆત કરી છે. પરંતુ કોઈ કાર્યવાહી કરવામાં આવી નથી. વહીવટી તંત્ર હોસ્પિટલના કારણે સ્થાનિક રહીશો માટે ઉભી થયેલી સમસ્યાનો ઉકેલ ન કરશે તો ઉચ્ચ કક્ષાએ રજૂઆત કરશે.