સુરતના રીંગરોડ પર આવેલી સુરત ટેક્સ્ટાઇલ માર્કેટના બીજા માળે દુકાનમાં આજે સવારે શોર્ટ સર્કિટ થવાના કારણે માળીયામાં આગ ભડકી ઉઠી હતી. આગ લગતા જ દુકાનમાં હાજર તેમજ અન્ય આજુબાજુના દુકાનદારો અને કારીગરોમાં દોડધામ મચી ગઈ હતી. ઘટના અંગે ફાયર બ્રિગેડને જાણ થતા માનદરવાજા, મજુરા, ઘાંચીશેરી અને નવસારી બજાર ફાયર સ્ટેશનથી ફાયર જવાનો કાફલો ઘટના સ્થળે પહોંચી ગયો હતો. ફાયરજોવાનો દ્વારા તાત્કાલિક આગ ઓલાવવા પાણીનો છંટકાવ અને કામગીરી શરૂ કરવામાં આવી હતી અને એક કલાકની જહેમત બાદ આગ પર કાબૂ મેળવ્યો હતો. જયારે ફાયર ઓફિસરે જણાવ્યું હતું કે, આગના કારણે દુકાનમાં મુકેલ સાડીઓનો જથ્થો તેમજ તૈયાર લહેંગાનો જથ્થો સહિત મોટા પ્રમાણમાં માલને નુકશાન થયો હતો. જોકે આ ઘટનામાં કોઈપણ પ્રકારની ઈજા કે જાનહાની થઈ ન હતી.