સુરત જિલ્લાનાં પલસાણા તાલુકાનાં વરેલી ગામે રહેતા કેતનકુમાર મગનભાઈ પરમાર ખાનગી કંપનીમાં નોકરી કરે છે. જોકે શુક્રવારે સવારે તેઓ વરેલી ખાતે આવેલ એક્ઝીસ બેંકના એ.ટી.એમ.માં પૈસા ઉપાડવા ગયા હતા તે સમયે એ.ટી.એમ. કેબિનમાં એક શખ્સ હાજર હતો.

જેથી કેતનભાઈએ એ.ટી.એમ.માંથી પૈસા કાઢવા માટે પ્રયાસ કર્યા પરંતુ પૈસા ન નીકળતા ત્યાં હાજર અજાણ્યા શખ્સે તેમને પૈસા કાઢી આપવા જણાવ્યું હતું અને આ દરમિયાન તેણે એ.ટી.એમ. કાર્ડ બદલી લીધો હતો અને બીજો કાર્ડ કેતનકુમારને આપી દીધો હતો. ઘરે પહોંચ્યા બાદ તેમના મોબાઇલ ફોન પર ૧૦-૧૦ હજાર બે વખત ઉપડી ગયા હોવાનો મેસેજ આવતા તેઓ ચોંકી ઉઠયા હતા. તેમણે એ.ટી.એમ. ચેક કરતા કાર્ડ બદલાયેલો હતો. બનાવ અંગે કડોદરા જી.આઈ.ડી.સી. પોલીસમાં જાણ કરી હતી.