તાપીમિત્ર ન્યુઝ,વ્યારા:તાપી જિલ્લા સહિત સમગ્ર દક્ષિણ ગુજરાતમાં મેઘાની મહેર બુંદ સ્વરૂપે વરસી રહી છે.તાપી જિલ્લામાં પણ સારો વરસાદ થતા ધરતીપુત્રો ગેલમાં આવી ગયા છે.હવામાન વિભાગ દ્વારા આગામી દિવસોમાં તાપી સહિત સમગ્ર દક્ષિણ ગુજરાતમાં ભારેથી અતિભારે વરસાદ થવાની આગાહી કરવામાં આવી છે.ત્યારે તાપી જિલ્લાના જિલ્લા કલેકટર એન.કે ડામોરે અધિકારીઓને હેડકવાર્ટર નહિં છોડવા તાકીદ કરી છે. આપતિ વ્યવસ્થાપન કેન્દ્ર,કલેકટર કચેરી,તાપી તરફથી પ્રાપ્ત થતી વિગતો અનુસાર હવામાન વિભાગ દ્વારા આગામી દિવસોમાં તાપી સહિત સમગ્ર દક્ષિણ ગુજરાતમાં ભારેથી અતિભારે વરસાદ થવાની આગાહી કરવામાં આવી છે.જેને અનુલક્ષીને તાપી જિલ્લાના સમાહર્તા એન.કે ડામોરે તાપી જિલ્લાના અધિકારી/કર્મચારીઓને હેડક્વાર્ટર નહિં છોડવા તથા કંટરોલરૂમના સંપર્કમાં રહી કોઇ પણ પરિસ્થિતિનું નિર્માણ થાય તે સમયે તાત્કાલિક પરિસ્થિતિને પહોંચી વળવા આગોતરૂં આયોજન કરવા માટે સૂચના આપી છે.