Tapi mitra news:વેડ રોડ પંડોળના પટેલ ઇન્ડસ્ટ્રીયલમાં નયના ફેબ નામના બંધ પાવર લુમ્સ કારખાનામાંથી ભર દિવસે તસ્કરો ટેમ્પોમાં ટીએફઓ મશીનની મોટર સહિત અલગ - અલગ સરસામાન મળી કુલ રૂ. ૧.૪૪ લાખની મત્તા ચોરીને ફરાર થઇ ગયા હતા. શહેરના સૈયદપુરા વિસ્તારની ધોબી શેરીમાં રહેતા નિકુંજ અમૃતલાલ પેટીગરા વેડ રોડ પંડોળ સ્થિત પટેલ ઇન્ડસ્ટ્રીયલ એસ્ટેટ ૩ માં પ્લોટ નં. ૪૨૪૨ માં નયના ફેબ નામે પાવર લુમ્સનું કારખાનું ધરાવે છે. ગત માર્ચ મહિનામાં કારખાનામાં ઓફિસ બનાવવાનું શરૂ કર્યુ હતું પરંતુ લોક્ડાઉન લાગુ કરવામાં આવતા બાંધકામના મજૂરો ચાલ્યા જતા ત્યાર બાદથી કામ અટકી ગયું હતું અને કારખાનું પણ બંધ હતું. દરમ્યાનમાં ગત રોજ દિવસ દરમ્યાન તસ્કરો ટેમ્પોમાં આવ્યા હતા ટીએફઓ મશીન ચલાવવાની મોટર ૫ નંગ, મશીનના વજનીયા ૩૦ નંગ , મશીનના બુસ્ટર અને સ્પીનડલ ૮૦ નંગ ઉપરાંત અન્ય પાર્ટસ મળી કુલ રૂ. ૧.૪૪ લાખની મત્તા ચોરીને ભાગી ગયા હતા. આ અંગેની જાણ એસ્ટેટના અન્ય એક કારખાનેદારે નિકુંજ પેટીગરાને જાણ કરતા તેઓ તુરંત જ દોડી ગયા હતા અને ઘટના અંગે ચોકબજાર પોલીસ મથકમાં ફરિયાદ નોંધાવી હતી. પોલીસે ગુનો નોધી તપાસ હાથ ધરી છે.