Tapi mitra News;શહેરના કતારગામ વિસ્તારમાં રહેતા અને હીરા દલાલીનું કામ કરતા યુવાનની તેના મિત્ર અને હીરા વેપારીએ કરપીણ હત્યા કરી નાખી છે. હીરા દલાલે એક હીરા વેપારીના મહિલા સાથે અંગતપળોનો વીડિયો બનાવી બ્લેકમેલ કરતો હોવાની વાત સામે આવી છે. જે બાદ હીરા દલાલને  કારખાનામાં મળવા માટે બોલાવી હત્યા કરી નાખી હતી. આ કેસમાં આરોપી પોલીસ મથકે હજાર થતા પોલીસે આ મામલે ગુનો નોંધી બે આરોપીની અટકાયત કરી વધુ તપાસ શરુ કરી હતી. સુરતના કતારગામ વિસ્તારમાં આવેલા અંબિકા પાર્ક સોસાયટીમાં રહેતા અને મહીધરપુરા હીરા બજારમાં હીરા દલાલીનું કામ કરતા કાંતિભાઈ ગોરધનભાઇ રાખોલી  ગુમ થયાનું માલુમ પડતા પરિવારે આ મામલે કતારગામ પોલીસમાં ફરિયાદ આપી હતી. આ દરમિયાન એક યુવાને કતારગામ પોલીસ મથકે આવીને પોલીસને જાણકારી આપી હતી તેનું નામ આશિષ છે. તેના પિતરાઈ ભાઈ જે બપોરથી ગુમ છે તેની હત્યા તેના મિત્ર સંદીપભાઈ વસરામભાઈ પટેલે કરી નાખી છે. તેમજ કતારગામ ગોટાલાવાડીમાં આવેલા બારડોલીયા પ્લોટમાં આવેલ સી/રઘુનંદન એપાર્ટમેન્ટના ત્રીજા માળે તેમની લાશ સંતાડી છે. બનાવ સ્થળે કાંતિભાઈએ પહેરેલા કપડાં અને તેમનું બાઇક સગેવગે કરવા સારૂ સંદીપભાઈ મને સોંપતા હું કામરેજ તરફ મૂકી આવ્યો છું. આ બનાવમાં આશિષને પસ્તાવો થતા પોલીસ સ્ટેશનમાં પહોંચીને આ પ્રકારની જાણકારી આપી હતી. જે બાદમાં પોલીસે કતારગામ વિસ્તારમાં લક્ષ્મી રેસિડન્સી  ગજેરા સ્કૂલ પાસે રહેતા હીરા વેપારી સંદીપભાઇ વસરામભાઇ પટેલની અટકાયત કરી હતી. આરોપીની પૂછપરછ કરતા કાંતિભાઇ આરોપી સંદીપને મળવા તેમના કારખાનામાં નીચે ગયો હોવાનું માલુમ પડ્યું હતું. આરોપીએ જણાવ્યું હતું કે, કાંતિભાઈના મોબાઇલમાં મારો એક સ્ત્રી સાથેનો અંગતપળોનો વીડિયો હતો. તેઓ આ વીડિયો વાયરલ કરવાની ધમકી આપીને બ્લેકમેલ કરતા હતા. જે બાદમાં આરોપી સંદીપે કાંતિભાઈને કારખાનામાં નીચેના ભાગેથી ત્રીજા માળે ઉપર એકાંતમાં લાવી તેમનું કાયમના માટે કાશળ કાઢી નાખવાના ઇરાદે ગડદાપાટુનો માર મારી ગળું દબાવી હત્યા કરી નાખી હતી. હત્યા બાદ આરોપીએ લાશના કપડાં કાઢી કારખાનામાં પડેલી દોરીથી હાથપગ બાંધી પ્લાસ્ટિકના એક મીણીયામાં વીંટી દીધી હતી. જે બાદમાં લાશને એક રૂમમાં મૂકી દીધો હતો. ત્યારબાદ આરોપીએ તેના મિત્ર આશિષને ફોન કરી કારખાનાના નીચે બોલાવ્યો હતો. જે બાદમાં આરોપીએ કાંતિભાઈની હત્યા કર્યાનું જણાવ્યા બાદ તેમના કપડાં, બાઇક તથા મોબાઇલનું સીમકાર્ડ કામરેજ તરફ જઇ સગેવગે કરવા તથા નવો મોબાઇલ ફોન લેવા રૂ. ૩૦૦૦ રોકડા આપી કાંતિભાઈના ઘરે તેના સીમ કાર્ડથી ગેરમાર્ગે દોરવા ફોન કરવા જણાવી રવાના કરી દીધો હતો.