Tapi mitra News;સામાન્ય બાબતે થતી બોલાચાલી કઈ ઘડીએ ઉગ્ર સ્વરૂપ ધારણ કરી લઈ છે તે કોઈ નથી જાણતું. ઉચ્છલમાં પણ કઇંક આવો જ બનાવ બન્યો છે, જેમાં એક પિતાએ પોતાના જ સગા પુત્રને લાકડાના ફટકા મારી મોતને ઘાટ ઉતાર્યો હોવાનો બનાવ પોલીસ ચોપડે રજીસ્ટર થયો છે. તાપી જીલ્લાના ઉચ્છલ તાલુકાના ચઢવાણ ગામના દવાખાના ફળીયામાં રહેતા ભાનુદાસ કાંતિલાલ વસાવાએ આ બાબતે ઉચ્છલ પોલીસ મથકે ફરિયાદ કરી છે.તા.17મી મે નારોજ ચઢવાણ ગામના દવાખાના ફળીયામાં કાંતિલાલ સેગાભાઈ વસાવા નાઓએ તેના નાનો છોકરો આશિષભાઈ વસાવા પાસે ખર્ચના પૈસા માંગતો હોય અને આશિષભાઈ પૈસા આપવાની ના પાડતા પિતા કાંતિલાલ વસાવાએ પોતાના સગા પુત્ર આશિષભાઈને જણાવેલ કે,“આજે તો તું મને પૈસા નથી જ આપવાનો જેથી તને તો આજે પતાવી જ દઉં છું” તેમ કહી નજીકમાં પડેલ લાકડાનો ફટકો હાથમાં લઈ આશિષને માથામાં મારતા તે જમીન પર પડી બેભાન થઈ ગયો હતો,ઈમરજન્સી સેવા 108ની મદદથી પ્રાથમિક સારવાર ઉચ્છલ સરકારી દવાખાને કરાવી હતી અને વધુ સારવાર અર્થે વ્યારા જનરલ હોસ્પિટલ ખાતે ખસેડવામાં આવ્યો હતો,જ્યાં ફરજ પરના તબીબોએ આશિષભાઈને મૃત જાહેર કર્યો હતો.બનાવ અંગે ભાનુદાસ વસાવા નાઓની ફરિયાદના આધારે તા.18મી મે નારોજ પિતા કાંતિલાલ સેગાભાઈ વસાવા વિરુધ્ધ ઉચ્છલ પોલીસ મથકે ઈપીકો 302 તથા જીપી એક્ટ કલમ 135 મુજબ ગુનો દાખલ કરી આગળની વધુ તપાસ પીએસઆઈ એન.ઝેડ.ભોયા કરી રહ્યા છે.