Tapimitra News-અઠવાડિયા અગાઉ અમરોલી સાયણ રોડ અંજની ઈન્ડસ્ટ્રીઝ ત્રણ રસ્તા પાસેથી યુવાનની લોહીલુહાણ હાલતમાં  લાશ મળી આવતા પોલીસે અકસ્માતનો ગુનો દાખલ કરી તપાસ હાથ ધરી હતી દરમિયાન પોસ્ટમોર્ટમ રિપોર્ટમાં યુવાનને માથામાં અને આંખના નીચેના ભાગે ઇજા થવાને કારણે મોત નિપજ્યું હોવાનું બહાર આવ્યું હતું તેમજ ઘટના સ્થળ પાસેથી લોહીવાળો પથ્થર મળી આવવા ઉપરાંત સીસી કેમેરામાં યુવકને અજાણ્યો પથ્થર મારતો હોવાનું ફુટેજ મળતા પોલીસે હત્યાનો ગુનો દાખલ કરી આગળની તપાસ હાથ ધરી છે. અમરોલી સાયણ રોડ અંજની ઈન્ડસ્ટ્રીઝ ત્રણ રસ્તા પાસેથી ગત તારીખ ૮મી એપ્રિલ ના રોજ રાત્રે પોણા નવેક વાગ્યાના આરસામાં એક અજાણ્યો યુવક લોહીલુહાણ હાલતમાં મળી આવ્યો હતો. યુવકને સારવાર માટે સ્મીમેર હોસ્પિટલમાં ખસેડવામાં આવ્યો હતો ત્યાં યુવકનું ચાલુ સારવાર દરમિયામ મોત નિપજ્યું હતુ. બનાવ અંગે પોલીસે અકસ્માત મોતનો ગુનો દાખલ કરી તપાસ હાથ ધરી હતી જેમાં યુવકના ખિસ્સામાંથી મળી આવેલ મોબાઈલ પરથી ફોન ડાયલ નંબરના આધારે તપાસ કરતા તેની ઓળખ બિજય આરક્શીત મલિક (ઉ.વ.૩૦)રહે.રાધા ટેક્સટાઇલ, અંજની ઇન્ડસ્ટ્રીઝ ૨,અમરોલી અને મૂળ ગંજામ, ઓરિસ્સા) તરીકે થઈ હતી. બિજયના પોસ્ટમોર્ટમ રિપોર્ટમાં માથા અને આંખના નીચે ઇજા હોવાનું તથા માથામાં ઇજા થી હોવાનુ બહાર આવ્યું હતું જેથી પોલીસે ઘટના સ્થળની તપાસ કરતા લોહી વાળો પથ્થર મળી આવ્યો હતો બિજયની પથ્થર મારી હત્યા કરવામા આવી હોવાનુ સ્પષ્ટ થયા બાદ પોલીસે સ્થાનિક વિસ્તારના સીસીટીવી ફુટેજ ચેક કર્યા હતા. જેમાં અંજની ઇન્ડસ્ટ્રીઝના તિર્થ ટેક્સટાઇલના ખાતા નં. ૩૪૨ના સીસીટીવી ફુટેજમાં મૃતક બિજય સાથે એક યુવાન ઝઘડો કરી મારામારી કરતા અને રસ્તા પર પડેલો પથ્થર ઉંચકીને માર માર્યાનું નજરે પડયું હતું. જેથી પોલીસે સીસીટીવી ફુટેજ ઉપરાંત પોસ્ટમોર્ટમ રિપોર્ટના આધારે અજાણ્યા યુવાન વિરૂધ્ધ બિજય મલિકના હત્યાનો ગુનો નોંધી હત્યારાની શોધખોળ હાથ ધરી છે.(ફાઈલ ફોટો)