Tapi mitra News- "કોરોના"ના સંક્રમણને રોકવા માટે અમલી "લોકડાઉન" ની પરિસ્થિતિ વચ્ચે રાતદિવસ ખડે પગે સેવા આપતા પોલીસ ફોર્સના જવાનોના સ્વાસ્થ્યની ચિંતા પણ રાજ્ય સરકાર રાખી રહી છે. તાપી જિલ્લાના આવા જ ૨૪/૭ સેવા બજાવતા પોલીસના જવાનોની રોગ પ્રતિકારક શક્તિ વધારવા માટે, રાજ્યના આયુષ વિભાગના માર્ગદર્શન અનુસાર જિલ્લા આયુર્વેદ કચેરી દ્વારા "શંશમની વટી" ગોળીના ૨૫૦૦ જેટલા પેકેટ્સ પોલીસ વિભાગને સુપ્રત કરવામાં આવ્યા છે. તાપી જિલ્લા કલેકટર શ્રી આર.જે.હાલાણીના માર્ગદર્શન અનુસાર, જિલ્લા આયુર્વેદ અધિકારીશ્રી વૈદ્ય જયશ્રીબેન ચૌધરી તથા જિલ્લાના અન્ય મેડિકલ ઓફિસરો, જિલ્લાના કમ્પાઉન્ડર શ્રી વિજય જયસ્વાલ અને તેમની ટિમ દ્વારા તૈયાર કરાયેલી આ "રોગ પ્રતિકારક શક્તિ" વધારનારી "શંશમની વટી" ગોળીના પેકેટ્સ નાયબ જિલ્લા પોલીસ અધિક્ષક શ્રી પરમારને સુપ્રત કરવામાં આવ્યા છે. આમ, "લોકડાઉન"ની સ્થિતિ વચ્ચે રાતદિવસ ફરજ બજાવતા વરદીધારીઓના આરોગ્યની ચિંતા પણ જિલ્લા વહીવટી તંત્ર, અને રાજ્ય સરકાર કરી રહી છે.