તાપીમિત્ર ન્યુઝ,સુરત:પાંડેસરા કૈલાશ ચોકડી નજીક બાઇક સવાર ૩ લૂંટારુ રાહદારીનો ફોન ઝૂંટવી ફરાર થઈ ગયા હતા. દારૂના નશામાં કામ પર જતો ૩૯ વર્ષીય બબલુ પટેલ લૂંટારુ બાઇક સવારના ધક્કાથી રોડ ઉપર પડી જતા ઘવાયો હતો. ઇજાગ્રસ્ત બબલુને સારવાર માટે ૧૦૮ની મદદથી સાથી મિત્ર સિવિલ લઈ આવ્યો હતો. સાથી મિત્રએ જણાવ્યું હતું કે, બબલુ દારૂના નશામાં હોવાથી લૂંટારુનો સામનો પણ ન કરી શક્યો.પાંડેસરા કૈલાશ ચોકડી નજીકથી બબલુ અને તેનો મિત્ર રામ પ્રકાશ સરોજે નોકરી પરથી આવતો હતો અને બબલુ નોકરી પર જતો હતો. ત્યારે બબલુને બાઇક સવાર ત્રણ પૈકી એકે લાત મારતા બબલુ જમીન પર પડી ગયો હતો. જેને લઈ તેઓ દોડીને બાઇક સવાર ત્રણ પૈકી એકને પકડી પાડ્યો હતો. જેને છોડવા બે બાઇક સવાર દોડી આવ્યા હતા અને તેમની ઉપર હુમલો કરી જાહેરમાં માર માર્યો હતો. લોકો જોતા રહ્યા અને બાઇક સવાર લૂંટારુઓ બન્ને મિત્રોને જાહેરમાં ફટકારી બબલુનો ૯ હજારનો વિવો મોબાઈલ લૂંટી ભાગી ગયા હતા. આ ઘટનામાં તેમનો મોબાઈલ પણ લૂંટારુઓએ જમીન પર ફેંકી તોડી નાખ્યો હતો. બબલુ દારૂના નશામાં હોવાથી બાઇક સવાર લૂંટારુઓનો સામનો પણ કરી ન શક્યો હતો.