તાપીમિત્ર ન્યુઝ,વાલોડ:વાલોડનાં નાલોઠા ગામે ડેરી ફળિયામાં રહેતા રાજેશભાઈ મોતીયાભાઇ ગામીત નાઓ બુહારી વેડછી સર્કલ નજીક આવેલ હોટલમાં કામ કરી પરિવારનું ગુજરાન ચલાવે છે.તેમનો 13 વર્ષીય પુત્ર પ્રેમ ધો-8માં વાલોડ શ્રધ્ધા હાઇસ્કૂલમાં અભ્યાસ કરે છે.જેથી તેઓ સવારે 8:00 વાગ્યાની આસપાસ પોતાની મોટરસાયકલ નંબર જીજે-26-ક્યૂ-6238 લઈ તેમના પુત્રને વાલોડ હાઇસ્કૂલમાં મૂકવા જઈ રહ્યા હતા ત્યારે વાલોડ બુહારી રોડ ઉપર આવેલ એસ્સાર પેટ્રોલપંપ નજીકથી પસાર થઈ રહ્યા હતા.ત્યારે પૂર ઝડપે આવી રહેલ એક આઇસર ટેમ્પો નંબર-જીજે-7-યુયુ-8867ના ચાલકે રાજેશભાઈની મોટરસાયકલને અડફેટે લીધી હતી.સર્જાયેલા અકસ્માતમાં રાજેશભાઈને માથાના તેમજ શરીરના ભાગે ગંભીર ઇજા પહોંચતા તેમનું મોત નીપજયું હતું.જ્યારે મોટરસાયકલની પાછળ બેઠેલ પ્રેમને નાની મોટી ઇજા પહોંચી હતી.બનાવ અંગે વાલોડ પોલીસ મથકે ગુનો રજીસ્ટર કરી આગળની તપાસ હાથ ધરી છે.