તાપીમિત્ર ન્યુઝ,વ્યારા:આગામી તા.૨૬મી,જાન્યુઆરીના રોજ સવારે ૦૯:૦૦ કલાકે તાપી જિલ્લાના જિલ્લા કક્ષાના પ્રજાસત્તાક પર્વની ઉજવણી સોનગઢ ખાતે આવેલી સાર્વજનિક હાઇસ્કૂલના પટાંગણમાં ગુજરાત વિધાનસભાના અધ્યક્ષ રાજેન્દ્રભાઇ ત્રિવેદીના હસ્તે ધ્વજવંદન કરી દબદબાભેર ઉજવણી કરવામાં આવશે.તાપી જિલ્લાના જિલ્લા સમાહર્તા એન.કે.ડામોરના સીધા માર્ગદર્શન હેઠળ જિલ્લા વહીવટીતંત્ર દ્વારા ૭૦મા પ્રજાસત્તાક પર્વની દબદબાભેર ઉજવણી કરવાનું નકકી કરવામાં આવ્યું છે.પ્રજાસત્તાક પર્વની જિલ્લા કક્ષાની ઉજવણી સુપેરે પાર પડે એ માટે જિલ્લા વહીવટીતંત્ર દ્વારા તડામાર તૈયારીઓ આરંભી દેવામાં આવી છે.જિલ્લા કક્ષાના પ્રજાસત્તાક પર્વની ઉજવણી માટે જિલ્લા કલેકટરના માર્ગદર્શન હેઠળ જિલ્લા વહીવટીતંત્ર દ્વારા ઘડી કાઢવામાં આવેલા આયોજન મુજબ રંગારંગ સાંસ્કૃતિક કાર્યક્રમો, જિલ્લાની વિવિધ કચેરીઓ દ્વારા તૈયાર કરવામાં આવેલા વિકાસની ઝાંખી કરાવતા ટેબ્લોઝ,જિલ્લા પોલીસ તંત્રની પરેડ અને માર્ચ પાસ્ટઆકર્ષણનું કેન્દ્ર બની રહેશે.આ ઉપરાંત જિલ્લામાં વિશિષ્ઠ કામગીરી કરનાર વ્યક્તિ વિશેષો,જિલ્લાના સ્વાતંત્ર્ય સેનાની,જુદી જુદી કચેરીઓમાં શ્રેષ્ઠ કામગીરી કરનાર અધિકારી/કર્મચારીઓનું પણ રાજય વિધાનસભાના અધ્યક્ષ રાજેન્દ્રભાઇ ત્રિવેદીના હસ્તે પ્રમાણપત્ર આપીને સન્માન કરવામાં આવશે.સોનગઢ ખાતે યોજાનારી આ જિલ્લા કક્ષાના પ્રજાસત્તાક પર્વની ઉજવણીમાં મોટી સંખ્યામાં ઉપસ્થિત રહેવા માટે જિલ્લાના પ્રજાજનોને જિલ્લા કલેકટર એન.કે ડામોર દ્વારા જાહેર અનુરોધ કરાયો છે.