વલસાડ જિલ્લાના પારડી તાલુકામાં નેશનલ હાઈવે ઉપર ખડકી બ્રિજ પાસે સર્જાયેલા અકસ્માતમાં વલસાડમાં મામાને ત્યાં રહેતા અને મૂળ મહેસાણાના યુવકનું કરુણ મોત થયું હતું. જ્યારે બાઈક પર યુવાન સાથે સવાર તેના મિત્રને ગંભીર ઈજા થતા તેને વલસાડ સિવિલમાં ખસેડાયો હતો.

સુત્રો પાસેથી મળતી માહિતી મુજબ, વલસાડના મોગરાવાડી વિસ્તારમાં મામાને ત્યાં રહેતા અને મૂળ મહેસાણાના વતની ૨૦ વર્ષીય વિજય રાજુભાઈ દંતાણીયા (દેવીપૂજક) તેમના મિત્ર રણજીત રવાભાઈ સાથે પારડી-વાપી વિસ્તારમાં કપડાંની ફેરી કરવા નીકળ્યા હતા. દરમિયાન બપોરે ૧:૩૦ વાગ્યાના સુમારે વલસાડ તરફના ખડકી બ્રિજ ઉતરતી વખતે તેમની મોટરસાઈકલ સ્લીપ થઈ ગઈ હતી. આ અકસ્માતમાં બંને યુવકો રોડ ઉપર પટકાયા હતા. મોટરસાઈકલ ચલાવી રહેલા વિજય દંતાણીયાને માથામાં ગંભીર ઈજા થતાં તેમનું સ્થળ પર જ મોત થયું હતું. જ્યારે વિજયની પાછળ બેઠેલા રણજીત રવાભાઈને ગંભીર ઈજાઓ થતાં તેમને સારવાર માટે વલસાડ સિવિલ હોસ્પિટલમાં ખસેડવામાં આવ્યા હતા. બનાવ અંગે પારડી પોલીસે વિજયના મૃતદેહનું પોસ્ટમોર્ટમ કરાવી વધુ કાર્યવાહી હાથ ધરી હતી.