નવસારી એસ.ટી.ડેપો પાસેથી એલસીબી પોલીસે બાતમીના આધારે રીઢા ચોરને ઝડપી પાડયો હતો. જયારે ૧૦ મહિના અગાઉ જલાલપોર તાલુકાના હાંસાપોર ગામે થયેલી ઘરફોડ ચોરીનો ભેદ ઉકેલાયો છે. તેમાં સામેલ અન્યને તસ્કરોને પોલીસે વોન્ટેડ જાહેર કર્યા હતા. આરોપી પાસેથી હાંસાપોર ખાતે ચોરી કરેલા રૂપિયા ૩.૦૨ લાખનો મુદ્દામાલ કબજે કર્યો હતો. મળતી માહિતી મુજબ, નવસારી જિલ્લામાં સતત ઘરફોડ ચોરીની ઘટનાઓના પગલે એલસીબી પોલીસે તસ્કરોને પકડવા માટે બાતમીદારોને સક્રિય કર્યા હતા.

જેમાં પોલીસને બાતમી મળી હતી કે, નવસારી એસ.ટી. ડેપો પાસે એક શખ્સ ઊભો છે, જે ચોરીની ઘટનામાં સામેલ છે. આથી પોલીસે તેને પકડી લાવી પુછપરછ હાથ ધરી હતી, જેમાં તેણે પોતાનું નામ મુકેશ બંગડા કમના (ઉ.વ.૩૨) હોવાનું જણાવી તે મધ્યપ્રદેશના ધાર જિલ્લાના ડાવરીયા ગામનો રહેવાસી હોઈ, પોતાના અન્ય બે સાગરીતો સાથે મળી ઘરફોડ ચોરીઓ કરતો હોવાની કબુલાત કરી હતી. જલાલપોર તાલુકાના હાંસાપોર ગામે સીલ્વર પામ એપાર્ટમેન્ટના ૧૦ મહિના અગાઉ બંધ ફ્લેટને નિશાન બનાવી રૂ.૩.૦૨ લાખના સોના-ચાંદીના દાગીનાની ચોરી કરી હતી. બનાવ અંગે વિજલપોર પોલીસમાં ગુનો નોંધાયો હતો.

આરોપી પાસેથી પોલીસે ચોરી કરેલા તમામ સોનાના-ચાંદીના દાગીના સહિત તમામ મુદ્દામાલ કબજે કર્યો હતો અને પોલીસે તેની ધરપકડ કરી તેના બે સાગરીત હબુ અને નાનકો રણીયાસીંગડ (બન્ને રહે.બધવલી ગામ, જિ.ધાર, મધ્યપ્રદેશ)ને વોન્ટેડ જાહેર કર્યા છે. આ આરોપીઓ રીઢા ગુનેગાર છે. તેમના ઉપર વાહનચોરી ઘરફોડના ૪ ગુના નોંધાયેલા હતા. આરોપીઓ ચોરી કરવા માટે પોતાના ગામથી સરકારી બસમાં બેસીને હાઈ-વે ઉપર ઉતરી જઈ નજીકમાં આવેલા ગ્રામ્ય અને શહેરી વિસ્તારની સોસાયટીના બંધ મકાનોને નિશાન બનાવી ભાગી જવાની મોડસ ઓપરેન્ડી ધરાવે છે. પોલીસે પકડાયેલા આરોપીના રિમાન્ડ મેળવવાની તજવીજ હાથ ધરી છે.