ભરૂચ શહેરનાં મકેરી ફળિયામાં જર્જરિત મકાનની દીવાલ ધરાશાયીની ઘટના સામે આવી હતી. જયારે સમગ્ર ઘટના બાજુમાં લગાવેલ CCTV કેમેરામાં પણ કેદ થઇ છે. દીવાલ ધરાશાયી થતા નીચે પાર્ક કરેલા વાહનોમાં નુકસાન થયું હતું. જોકે, કોઈ જાનહાની થઈ ન હતી. જેથી તમામ લોકોએ રાહતનો શ્વાસ લીધો હતો. સુત્રો પાસેથી મળતી માહિતી મુજબ, ગતરોજ વહેલી સવારે ભરૂચ શહેરના મકેરી ફળિયામાં જર્જરિત મકાનની દીવાલ ધરાશાયી થઇ હતી જેને પગલે વહેલી સવારે વિસ્તારમાં દોડધામ મચી જવા પામી હતી.

જોકે સવારમાં ઘટના બની હોવાથી કોઈને પણ જાનહાની થવા પામી ન હતી. પરંતુ દીવાલ ધરાશાયી થવાને કારણે નજીકમાં રહેલ એકટીવા સહીત બે વાહનોને નુકશાન થવા પામ્યું હતું. ઘટનાને પગલે સ્થાનિકોએ નગર પાલિકાના ફાયર વિભાગમાં જાણ કરતા ફાયર ફાયટરો સ્થળ પર દોડી આવ્યા હતા અને કાટમાળ ખસેડવાની કામગીરી હાથ ધરી છે. આ ઘટનાના CCTV કેમેરાના ફૂટેજ બહાર આવ્યા છે જેમાં સમગ્ર ઘટના કેદ થઇ હતી.