નવસારીના વિરાવળ ખાતે ગણેશજીની પ્રતિમાનું વિસર્જન માટે કુત્રિમ તળાવ બનાવાયા હતા. જેમાં ગણેશ પ્રતિમાના વિસર્જન બાદ આ પાણીમાં સ્થાનિક યુવકોને શરીરે ખંજવાળ અને તાવની અસર દેખાતા તમામને સારવાર અપાઇ હતી. નવસારીમાં વિરાવળમાં આવેલી પૂર્ણાં નદીમાં પ્રતિમાઓના વિસર્જન માટે બે કૃત્રિમ તળાવો બનાવવામાં આવ્યાં છે. જેમાં દોઢ, 3 અને 5 દિવસના શ્રીજીની નાની મોટી પ્રતિમાઓનું વિસર્જન કરવામાં આવ્યું હતું. આ તળાવોમાં શ્રીજીની પ્રતિમાનું વિસર્જન કરનારા 10 જેટલા યુવકો આ બંધિયાર પાણીમાં સતત કામ કરતા હોય શરીરે ખંજવાળ બાદ તાવનો ભોગ બન્યાં હતા. તેઓ બંધિયાર પાણીમાં વિસર્જન થયેલા શ્રીજીની પ્રતિમા પરનો કેમિકલયુક્ત રંગ પાણીમાં ભળી જતા આ પાણી બંધિયાર હોય એલર્જીનો ભોગ બન્યા હતા. જોકે, તમામ યુવકોને સારવાર આપવામાં આવી હોવાનું માહિતી ગણેશ સંગઠન દ્વારા આપવામાં આવી હતી.

જયારે જિલ્લામાં માનતાના 7 દિવસના ગણપતિની પ્રતિમાઓનું વિસર્જન ભક્તોએ ઉલ્લાસપૂર્વક કર્યું હતું. જેમાં નવસારીમાં આવેલી પૂર્ણ નદીના 3 ઓવારા વિરાવળમાં 180થી વધુ, ધારાગીરીના ઓવારા પરથી 60, જલાલપોર સંતોષી માતાના મંદિર પાસેથી 40 જેટલી પ્રતિમાનું વિસર્જન કરાયું હતું. ઐતિહાસિક દાંડીના દરિયામાં 7મા દિવસે સાંજે પોણા સાત વાગ્યા સુધીમાં શ્રીજીની 5 મોટી અને 91 નાની મળી કુલ 96 પ્રતિમાનું વિસર્જન ભકતો દ્વારા કરાયું હતું. આ ઉપરાંત પાંચમા દિવસે 7 મોટી અને 110 નાની મળી કુલ 117 શ્રીજીની પ્રતિમાનું વિસર્જન થયું હતું.