મહારાષ્ટ્રના નાશિકથી મુસાફરો ભરેલી મહારાષ્ટ્રની એસ.ટી.બસ કપરાડાના દાભાડી ગામેથી પસાર થઈ રહી હતી. આ દરમિયાન આ વિસ્તારમાંથી પસાર થઈ રહેલા પીકઅપના ચાલકે કાબૂ ગુમાવી પીકઅપ બસના પાછળના ભાગે ઘસડાવીને લઈ ગયો હતો. આ સમયે બસની બારીની બહાર હાથ રાખનાર વાપીના મુસાફરને ગંભીર ઇજા થઇ હતી. મળતી માહિતી મુજબ, મહારાષ્ટ્રના નાશિક ડેપોની એસ.ટી. બસના ચાલક સંજીવ બબનરાવ ભુંગે અને બસ કંડક્ટર સંભાજી પંઢરીનાથ જાધવ સાથે વાપી આવવા માટે નીકળ્યા હતા. બસ કપરાડાના દાભાડી ગામેથી પસાર થઇ રહી હતી.

તે સમયે સામેથી આવી રહેલી પીકઅપના ચાલકે અકસ્માત ટાળવાના પ્રયાસ કરતા તેની પીકઅપ ગાડી બસના પાછળના ભાગે ઘસડાઈ હતી. આ સમયે બસના પાછળના ભાગે બારીની બહાર હાથ કાઢીને બેસેલ સૂરજ પરશુરામ પાંડે (રહે. ચણોદ ગેટ પાસે, વાપી, જિ.વલસાડ)ના હાથમાં ફેક્ચર થયું હતું. ઈજાગ્રસ્ત મુસાફરને સારવાર માટે કપરાડા સી.એચ.સી.માં અને ત્યારબાદ વધુ સારવાર માટે વલસાડની સિવિલ હોસ્પિટલમાં રિફર કરવામાં આવ્યો છે. અકસ્માત સર્જનાર પીકઅપ ચાલક ફરાર થઈ ગયો હતો. જે બાબતે બસ ચાલકે પીકઅપના ચાલક સામે કપરાડા પોલીસ મથકમાં ફરિયાદ નોંધાવતા પોલીસે ગુનો નોંધી વધુ તપાસ હાથ ધરી હતી.