સુરત જિલ્લાનાં પીપોદરા નેશનલ હાઇવે નંબર ૪૮ પર અજાણ્યા વાહન ચાલકે બાઈકને અડફેટમાં લેતા ડેડીયાપાડાના મોટી ભોમરી ગામના બાઇક ચાલકનું ગંભીર ઈજા થવાથી ઘટના સ્થળે મોત નિપજ્યું હતું, જ્યારે તેની સાથે બાઈક પર બેઠેલી ડેડીયાપાડાના કોલીવાડા અને સાબુતી ગામની બે યુવતીને ઈજા થઈ હતી.

મળતી માહિતી મુજબ, ડેડીયાપાડા તાલુકાનાં મોટી ભોમરી ગામે રહેતા ૨૦ વર્ષીય રાહુલભાઈ નંદલાલભાઈ વસાવા સહિત ડેડીયાપાડાનાં કોલીવાડા ગામની પ્રિન્સીબેન વસાવા અને ડેડીયાપાડાનાં સાબુતી ગામની પાયલબેન વસાવા સાથે પોતાની બાઇક લઈને પીપોદરા ગામની સીમમાં નેશનલ હાઈવે નંબર-૪૮ પર ભાગ્યોદય હોટલની સામે અમદાવાદથી મુંબઇ તરફ જતા માર્ગ પરથી પસાર થઇ રહ્યા હતા. જે દરમ્યાન પાછળથી પુરપાટ આવી રહેલા અજાણ્યા વાહન ચાલક ગલતભરી રીતે હંકારી રાહુલભાઈની બાઈકને અડફેટમાં લઈ વાહન લઈને ફરાર થઇ ગયો હતો. આ ઘટનામાં રાહુલભાઈને માથાનાં તેમજ શરીરનાં વિવિધ ભાગે ગંભીર ઈજાઓ પહોંચતા તેનું ઘટના સ્થળે મોત થયું હતું તેમજ પ્રિન્સીબેન અને પાયલબેનને ઈજાગ્રસ્ત હાલતમાં સારવાર અર્થે નજીકની હોસ્પિટલ ખાતે ખસેડવામાં આવ્યા હતા. અકસ્માત અંગે કોસંબા પોલીસને જાણ કરવામાં આવતા હાલ પોલીસે અજાણ્યા વાહન ચાલક વિરૂદ્ધ ગુનો નોંધી આગળની તપાસ હાથ ધરી હતી.