ભરૂચ જિલ્લાનાં ડુમવાડ વિસ્તારમાં રહેતા, 35 ઈર્શાદભાઈ શેખને ગત તારીખ 6ઠ્ઠી એપ્રિલએ કોરોના લક્ષણો દેખાતા સારવાર માટે ભરૂચ ખાનગી હોસ્પિટલમાં દાખલ કર્યા હતા. ત્યારબાદ ત્રણ દિવસ સારવાર બાદ સ્થિતિમાં કોઈ સુધારો ન થતા વધુ સારવાર માટે સુરતની ખાનગી હોસ્પિટલમાં ખસેડવામાં આવ્યા હતા.

ત્યાં સીટીસ્કેન રિપોર્ટ કરાવતાં તેમના ફેફસામાં 100 ટકા ઈન્ફેકશન જણાયું હતું. ઈર્શાદભાઈ દાખલ થયાં ત્યારે તેમનું ઓક્સિજન લેવલ 60 હતું અને એન.આર,બી.એમ માસ્ક આપવા છતાં પણ લેવલ 80 રહેતુ હતું. જેથી તેમને 10 દિવસ બાયપેપ પર, આઠ દિવસ એન.આર.બી.એમ. પર રાખવામાં આવ્યા હતા. ફુડ પ્રોસેસિંગ વ્યવસાય સાથે સંકળાયેલા ઈર્શાદ શેખના પરિવારમાં તેમના માતા-પિતા પણ કોરોનાગ્રસ્ત થયા હતા. જેમાં માતાનું  અવસાન થયું હતું. જયારે પિતા કોરોનાથી સ્વસ્થ થયા હતા. ઇર્શાદની તબિયતમાં સુધારો આવતા તેમને તારીખ 25મી મે ના રોજ રજા  આપવામાં આવી હતી.