તાપીમિત્ર ન્યુઝ,સુરત:શહેરમાં પુનઃ સક્રિય થયેલા મોટરસાઇકલ સવાર ચેઇન સ્નેચરો ઘોડદોડ રોડ જોગર્સ પાર્ક પર ત્રાટકયા હતા પુત્ર સાથે મોપેડ પર જઇ રહેલી વૃધ્ધાના ગળામાંથી રૂ. ૩૦ હજારની સોનાની ચેઇન આંચકીને ભાગી ગયા હતા. શહેરના સીટીલાઇટ વિસ્તારમાં મંગળવારે લોકભારતી સ્કુલના ગેટ સામેથી મોપેડ પર પસાર થઇ રહેલી ગૃહિણીને નિશાન બનાવી ગળામાંથી સોનાની ચેઇન આંચકી જનાર મોટરસાઇકલ સવાર ચેઇન સ્નેચરો ગત રોજ ઘોડદોડ રોડ જોગર્સ પાર્ક પર ત્રાટકયા હતા.  વેસુ સ્થિત એસ.ડી. જૈન કોલેજની સામે સોમેશ્વરા રેસીડેન્સીમાં રહેતા ૪૬ વર્ષીય જયાબેન રમેશભાઇ શાહ બુધવારે બપોરના સાડા ત્રણ વાગ્યાના અરસામાં પુત્ર સાથે મોપેડ પર અઠવાલાઇન્સ સ્થિત લાલ બંગલા વિસ્તારમાં રહેતા સંબંધીને ત્યાં જઇ રહ્યા હતા. ત્યારે હોન્ડા મોટરસાઇકલ પર ધસી આવેલા ચેઇન સ્નેચરોએ ચાલુ મોપેડ પર જયાબેનના ગળામાં પહેરેલી સોનાની ચેઇન કિંમત રૂ. ૩૦ હજારના મત્તાની આંચકીને ભાગી ગયા હતા.  જયાબેન અને તેમના પુત્રએ બુમાબુમ કરી હતી પરંતુ બપોરનો સમય હોવાથી લોકોની અવરજવર ઓછી હોવાથી સ્નેચરો બિન્દાસ્તપણે ઘોડદોડ રોડ તરફ ભાગી જવામાં સફળ રહ્યા હતા. ઘટના અંગે જયાબેને ઉમરા પોલીસ મથકમાં ફરિયાદ નોંધાવી હતી.પોલીસે ગુનો નોધી તપાસ હાથ ધરી છે.