તાપીમિત્ર ન્યુઝ,સુરત:શહેરમાં થર્ટી ફર્સ્ટને લઇ દારૂની રેલમછેલ કરવા માટે બુટલેગરો મોટાપાયે દારૂનો જથ્થો લાવવાનો પ્રયાસ કરી રહ્યા છે. પરંતુ સક્રિય બનેલી પોલીસ બુટલેગરોને પકડી પાંજરે પુરી રહી છે. વરાછા પોલીસે ભવાની સર્કલ પાસેથી દારૂનો જથ્થા ભરેલી રીક્ષા સાથે ત્રણ મહિલા સહિત ચારને ઝડપી પાડી પાંજરે પુર્યા છે. વરાછા પોલીસને બાતમી મળી હતી કે વરાછા ભવાની સર્કલ પાસેથી જીજે-૫-ઝેડઝેડ-૬૪૬૧ નંબરની રીક્ષામાં દારૂનો જથ્થો લઇને બુટલેગરો પસાર થવાના છે. આ હકીકતના આધારે પોલીસે વોચ ગોઠવી ઉપરોકત નંબરની રીક્ષા આવતા તેને અટકાવી હતી. ત્યારબાદ રીક્ષાની તલાસી લેતાં રૂ.૨૫,૮૦૦ની ૫૧૬ નંગ દારૂની બોટલ મળી આવી હતી. પોલીસે રીક્ષામાં બેસેલા ચાર જણાંની અટકાયત કરી પુછપરછ કરતાં પુણાગામ બલરામ નગર સોસાયટીમાં રહેતો ધર્મેન્દ્ર બૈજનાથ કુશ્વાહા , પુણાગામ શાક માર્કેટ પાસે રહેતી સરલા દિત્તા પરમાર , સોમીત્રા કાળુ સંગાળા અને પુજા કાંતિ નિનામા હોવાનું જણાવ્યુ હતુ. પોલીસે દારૂનો જથ્થો અને રીક્ષા મળી કુલ રૂ.૮૫,૮૦૦ની મત્તા કબ્જે કરી છે.