તાપીમિત્ર ન્યુઝ,સુરત:ઉધના દરવાજા ખાતેના રોકડિયા હનુમાન મંદિર પાસેથી પતિ અને બાળકો સાથે બાઈક પર જઈ રહેલી મહિલાના ગળામાં બાઈકર્સ ગેંગે ઝાપટ મારી રૂ.૩૧ હજારની કિંમતની સોનાની ચેઈનની લૂંટ ચલાવી નાસી છૂટ્યા હોવાનો બનાવ પોલીસ ચોપડે નોંધાયો છે.ઉધનાના ભાઠેના ખાતે આવેલ ઉષાનગરમાં રિતેષ રાણા પરિવાર સાથે રહે છે અને નોકરી કરી પરિવારનું ગુજરાન ચલાવે છે. ૨૭મી નવેમ્બરની રાત્રિના સુમારે રિતેષભાઈ પોતાની પત્ની ભૂમિકા અને બે બાળકો સાથે બાઈક ઉપર ઉધના દરવાજા ખાતેના રોકડીયા હનુમાન મંદિર પાસેથી પસાર થઈ રહ્યા હતા. તે દરમ્યાન પાછળથી એક બાઈક ઉપર આવેલા બે ઈસમો પૈકી એકે ભૂમિકાબેનના ગળામાં ઝાપટ મારી રૂ.૩૧ હજારની કિંમતની સોનાની ચેઈનની લૂંટ ચલાવી નાસી છૂટ્યા હતા. બનાવ સંદર્ભે ભૂમિકાબેનની ફરિયાદના આધારે ઉધના પોલીસે લૂંટનો ગુનો નોંધી વધુ તપાસ હાથ ધરી છે.