તાપીમિત્ર ન્યુઝ,સુરત:ઉન વિસ્તારમાં આવેલી અલ બરક્ત પબ્લિક સ્કૂલમાં જુનિયર કેજીની બાળકીને પનીશમેન્ટ અપાઈ હતી. પનીશમેન્ટ બાદ બાળકીના વાલીઓ સિવિલ હોસ્પિટલમાં બાળકીને લઈને સારવાર માટે દોડી આવ્યા હતા જ્યાં તેમણે સ્કૂલની શિક્ષિકા દ્વારા માર મરાયો હોવાના આક્ષેપ કર્યા હતાં. આ અંગે સ્કૂલના ટ્રસ્ટીએ જણાવ્યું હતું કે, સામાન્ય પનીશમેન્ટનો મુદ્દો બનાવી સ્કૂલને હેરાન કરવા માટે પનીશમેન્ટના બીજા દિવસે વાલીઓએ પણ સ્કૂલમાં ઘુસી હોબાળો કરી માર માર્યો હતો. ઉન વિસ્તારમાં આવેલી અલ બરક્ત પબ્લિક સ્કૂલમાં જુનિયર કેજીમાં પાંચ વર્ષીય અકસા અભ્યાસ કરે છે.ક્લાસમાં બાળકોએ તોફાન કર્યા હોવાથી ટીચર દ્વારા તમામ બાળકોને સજા આપવામાં આવી હતી. બાળકીના વાલીઓએ આક્ષેપ સાથે જણાવ્યું હતું કે, બાળકી તે દિવસે કોઈ તોફાન ન કરતી હોવા છતાં રોષ રાખીને માર મારવામાં આવ્યો હતો. ઘરે ન કહેવાની ધમકી પણ આપવામાં આવી હતી. સોમવારે સવારે માતા શિક્ષિકાની ફરિયાદ કરવા જતાં માસૂમ બાળકીને ઉઠક બેઠક કરાવાઈ હોવાનું બાળકીની માતા હરૂનનીશા આસિફ શેખએ વધુમાં ઉમેર્યું હતું કે,બાળકીના હાથ પર સોટી મારવામાં આવતા જમણા હાથની હથેળી પર લીલાશ આવી જતાં પરિવાર ચિંતિત થઈ ગયું છે. જ્યારે ઉઠક બેઠક કરાવતા બન્ને પગ મસલ્સ જામ થઈ ગયા છે. જેથી બાળકીને સારવાર અર્થે સિવિલ હોસ્પિટલ લઈને પહોંચ્યા હતાં. સ્કૂલના ટ્રસ્ટી નબીખાન ઈસ્લામ પઠાણએ જણાવ્યું હતું કે, અમે આ મુદ્દે કેમેરા ચેક કર્યા જેમાં ક્યાંય માર માર્યાનું દેખાતું નથી માત્ર પનિશમેન્ટ માટે ઉઠક બેઠક કરાવી હતી. પરમદિવસની આ ઘટના છે અમારા શિક્ષકોએ માર નથી માર્યો જો કે બીજા દિવસે એટલે કે બુધવારે બાળકીના વાલી અને તેમની સાથે અન્ય લોકો આવ્યાં હતાં. બાળકીના વાલીઓએ હોબાળો કરવાની સાથે સાથે શિક્ષિકા પર હાથ ઉપાડ્યાં હતાં. માર મારવાના મુદ્દે ખોટી હેરાનગતિ કરવામાં આવા મુદ્દા ઉછાળવામાં આવતાં હોય તેમ લાગે છે.