તાપીમિત્ર ન્યુઝ,સુરત: વરાછા-કાપોદ્રાના સવજી કોરાટ બ્રિજ પરથી સોપારીના વેપારીએ તાપી નદીમાં કૂદી આપઘાત કર્યો હતો. તાપી નદીમાં યુવાન કૂદ્યો હોવાની જાણ બ્રિજ પરથી પસાર થતાં રાહદારીએ ફાયર વિભાગને કરી હતી. ઘટનાની જાણ થતાં જ ફાયર વિભાગની ટીમો ઘટના સ્થળે પહોંચી ગઇ હતી. રાહદારીએ ચોક્કસ લોકેશન જણાવતા ફાયર વિભાગના જવાનોએ યુવકની શોધખોળ કરી તેને બહાર કાઢ્યો હતો. ત્યારબાદ યુવકને તાત્કાલિક હોસ્પિટલ સારવાર અર્થે ખસેડવામાં આવ્યો હતો. જ્યાં વેપારીને મૃત જાહેર કરવામાં આવ્યો હતો. સરથાણા વ્રજચોક ચેતન વ્રજરાજ એપાર્ટમેન્ટમાં રહેતા ચેતન મનસુખ પડસાલા સોપારીના ધંધા સાથે સંકળાયેલા હતા. શનિવારે સવારે ચેતનભાઇ સવજી કોરાટ બ્રિજ પર મોપેડ લઇને ગયા હતા. ત્યારબાદ અચાનક જ તાપીમાં છલાંગ મારતા રાહદારીઓ દોડી આવ્યા હતા. અને નદીમાં ડુબી રહેલા ચેતનભાઇને બચાવવા રાહદારીઓએ તાત્કાલ ફાયર બ્રિગેડને જાણ કરતા લાશ્કરો દોડી આવ્યા હતા. ફાયર બ્રિગેડે ચોક્કસ લોકેશનના આધારે શોધખોળ કરી ચેતનભાઇને બહાર કાઢી સારવાર અર્થે હોસ્પિટલમાં ખસેડ્યા હતા. પરંતુ હાજર તબીબોએ તેમને મૃત જાહેર કર્યા હતા. પોલીસને બ્રિજ પરથી મૃતક ચેતનભાઇની મોપેડ અને મોબાઇલ ફોન મળી આવ્યો હતો. પોલીસે મોબાઇલ મારફતે તેના પરિવારજનોનો સંપર્ક કરી ચેતન અંગેની માહિતી આપતા તેઓ ઘટના સ્થળે દોડી આવ્યા હતા. ચેતનભાઇના મોતના સમાચાર સાંભળી પરિવારજનો આઘાતમાં સરી પડ્યા હતા. અને સામી દિવાળીએ ચેતને ભરેલા પગલાંથી પરિવારમાં તહેવારની ખુશીઓ માતમમાં છવાઇ ગઇ હતી. ચેતને મોતની છલાંગ લગાવતા પહેલાં પોતાના પિતાને છેલ્લો ફોન કરી વાત કરી હોવાનું જાણવા મળ્યુ છે. હાલ આપઘાત પાછળનું કારણ જાણવા માટેની તજવીજ હાથ ધરી છે.