ડાંગ જિલ્લાનાં દક્ષિણ વન વિભાગનાં સાકરપાતળ રેંજમાં લાગુ આહવા તાલુકાનાં વાંગન ગામ ખાતે છેલ્લા ઘણા સમયથી દીપડાનો આતંક જોવા મળી રહ્યો હતો. જેના કારણે લોકોમાં ભયનો માહોલ સર્જાયો હતો. ત્યારે દક્ષિણ ડાંગ વન વિભાગના ડી.સી.એફ.નાં માર્ગદર્શન હેઠળ સાકરપાતળ રેંજના આર.એફ.ઓ.ની ટીમે પાંજરું ગોઠવ્યું હતું. આ દીપડો અવાર નવાર વાંગન ગામમાં આવી જતો હતો. જેથી ગ્રામજનોએ વન વિભાગમાં અરજી કરી હતી.

જેના અનુસંધાનમાં સાકરપાતળ રેંજ દ્વારા પાંજરું ગોઠવતા રાત્રીના અરસામાં આ દીપડો પાંજરે પુરાયો હતો અને હાલમાં વન વિભાગની ટીમે આ દીપડાને સુરક્ષિત રીતે પકડી પાડી નેશનલ પાર્ક વાંસદા ખાતે ખસેડવાની તજવીજ હાથ ધરી હતી. ત્યારે ગામના સ્થાનિક લોકોએ રાહતનો શ્વાસ લીધો હતો અને સાકરપાતળ વન વિભાગનાં અધિકારીઓનો પણ આભાર વ્યક્ત કર્યો હતો. ઉલ્લેખનીય છે કે, ગત વર્ષે વાંગન ગામ નજીક આવેલ નડગખાદી ગામમાં દીપડાનાં હુમલાના પગલે એક માણસનું મોત નીપજ્યું હતું. જ્યાં ડાંગ કલેક્ટરશ્રીએ દીપડાના હુમલામાં મૃત્યુ પામેલા ઇસમની અંતિમયાત્રામાં હાજરી આપી હતી અને તેના પરિવારને આ દુ:ખના સમયમાં નુકસાન સહન કરવાની સાંત્વના પાઠવી હતી અને ત્યારબાદ દક્ષિણ વન વિભાગની ટીમ દ્વારા કુલ ચાર દીપડાને પાંજરામાં કેદ કરવામાં આવ્યા હતા.