સુરત જિલ્લાનાં કામરેજનાં ઘલા ગામે પુત્રી સાથે પ્રેમ લગ્ન કરવાની અદાવતમાં ઉશ્કેરાયેલા પરીવારે યુવક અને સબંધી પર જીવલેણ હુમલો કરવાનાં મામલે કામરેજ પોલીસે બંને પક્ષે ગુનો નોંધતા ચકચાર મચી ગઇ હતી. સુત્રો પાસેથી મળતી માહિતી મુજબ, કામરેજ પોલીસની હદમાં આવેલ ઘલા ગામની સીમમાં રહેતા ખેડૂત રાકેશભાઇ બચુભાઇ રાઠોડનાં ફળીયામાં કાકાની વર્ષી હોવાનાં કારણે ભજનનું આયોજન કરવામાં આવ્યું હતું.

ભજન કાર્યક્રમમાં ગ્રામજનો સહિત બહારથી સગાસબંધીઓ આવ્યા હતા. જે પૈકી ખેડૂત રાકેશભાઈનાં મામાનાં પુત્ર વિક્રમે દોઢ વર્ષ પૂર્વે ઘલા ગામે રહેતા મહેશ વસાવાની દિકરી ઇશાને ભગાડી જઈ જેની સાથે લગ્ન કરી લીધા હતા. વિક્રમને ભજનમાં જોઈ જતા યુવતીનો પરીવાર ખેડૂત રાકેશભાઈ પાસે પહોંચી જઈ જણાવ્યું કે, વિક્રમને શું કામ અહીંયા બોલાવ્યો છે જે બાબતે ઝઘડો કરી ઉશ્કેરાય જઈ ગાળો આપી ચપ્પુ વડે જીવલેણ હુમલો કર્યો હોવાની ફરિયાદ કામરેજ પોલીસ મથકે કરવામાં આવી હતી. ત્યારે સામે પક્ષે પણ સમગ્ર ઘટના અંગે કામરેજ પોલીસ મથકે ફરિયાદ કરતા હાલ કામરેજ પોલીસે બંને પક્ષે ગુનો નોંધી આગળની તપાસ હાથ ધરી હતી.