સુરત જિલ્લાના પીપોદરા નેશનલ હાઈવે પર બાઇક ચાલકને અજાણ્યા વાહને ટક્કર મારતા બે લોકોને ગંભીર ઈજા સાથે હોસ્પિટલ ખસેડાયા હતા. પ્રાપ્ત માહિતી અનુસાર વિજયભાઈ ગોમાનભાઈ રાઠોડ બાઈક લઈને સાગરભાઈ સુરેશભાઈ રાઠોડને પાછળ બેસાડીને પીપોદરા ગામની સીમમાં મુંબઇથી અમદાવાદ નેશનલ હાઈવે નંબર-૪૮ પરથી પસાર થઈ રહ્યો હતો.

તે દરમિયાન હાઈવે પરથી જતો અજાણ્યો વાહન ચાલક વિજયભાઈની બાઈકને અડફેટે લઇ ફરાર થઈ ગયો હતો. જોકે અકસ્માતની ઘટનામાં વિજયભાઈ અને તેમની બાઇક પાછળ સવાર સાગરભાઈ રોડ ઉપર ધડાકાભેર પટકાતા જેમને માથાના તેમજ શરીરના વિવિધ ભાગે ગંભીર ઈજાઓ પહોંચતા જેમને સારવાર અર્થે નજીકની હોસ્પિટલ ખાતે ખસેડવામાં આવ્યા હતા. ત્યારે સમગ્ર અકસ્માતની ઘટના અંગે કોસંબા પોલીસને જાણ કરવામાં આવતા હાલ પોલીસે કસૂરવાર અજાણ્યા વાહન ચાલક વિરુદ્ધ ગુનો નોંધી આગળની કાર્યવાહી હાથ ધરી હતી.