તાપીના ડોલવણ તાલુકાનાં પલાસીયા ગામે રહેતો 10 વર્ષીય કિશોર ગુમ થઈ જતાં પરિવારજનોએ શોધખોળ કરવા છતાં કોઈ ભાળ ન મળતા પોલીસ મથકે અપહરણની ફરિયાદ નોંધાવી હતી.

સુત્રો પાસેથી મળતી માહિતી અનુસાર, ડોલવણનાં પલાસીયા ગામે ખાખરી ફળિયામાં રહેતા સુરેશભાઇ ગુમાનભાઈ ગામીત કે જેઓ હીરા ઘસી પોતાનું તથા પરિવારનું ગુજરાન ચલાવે છે. સુરેશભાઇનો 10 વર્ષીય પુત્ર જયલેશ ગામિત કે જે ગત તા.1 ઓક્ટોબરના રોજ ગુમ થઈ ગયો હતો. પરિવારજનોએ આસપાસના વિસ્તારમાં તેમજ સગાસંબંધીને ત્યાં તપાસ કરતાં કોઈ ભાળ ના મળી હતી. જયારે ગુમ થનાર જયલેશ રંગે ઘઉં વર્ણનો શરીરે મધ્યમ બાંધાનો તેમજ બોલવામાં તોતડાય છે અને ગુજરાતી તેમજ ગામીત ભાષા જાણે છે. જયલેશના પિતાએ ડોલવણ પોલીસ સ્ટેશનમાં અપહરણની ફરિયાદ નોંધાવી હતી.