ભગવાન રામની નગરી અયોધ્યામાં દિવાળી પર્વની ઝળહળતી ઉજવણી કરવા માટે તૈયારીઓ શરૂ થઈ ગઈ છે. આ વર્ષે પણ 16 ફ્લોટ સાથેની શોભાયાત્રા નિકળશે. જેમાં રામ જન્મભૂમિ મંદિરનાં તેમજ કાશી કોરિડોરનાં મંદિરનો પણ સમાવેશ થાય છે. આ શોભાયાત્રા આખા અયોધ્યાના રસ્તાઓ પર ફરશે. તમામ ફ્લોટમાં રામાયણને લગતી થીમ સાથેનું ડેકોરેશન કરવામાં આવશે. આજે આ શોભાયાત્રાનું રિહર્સલ કરવામાં આવી રહ્યુ છે. તારીખ 23 ઓક્ટોબરે વડાપ્રધાન મોદી પણ અયોધ્યાની મુલાકાત લેવાના છે અને રામ લલાનાં દર્શન કરવાના છે.

ત્યાર પછી તેઓ મંદિરનાં બાંધકામની સાઈટનું નિરિક્ષણ કરવાના છે. સાંજે સાડા છ વાગ્યે સરયૂ નદીનાં તટે આરતી યજાવાની છે અને તેમાં વડાપ્રધાન મોદી હાજરી આપશે. એ પછી રામજીની પેડી પર દિપોત્સવમાં પણ તેઓ ભાગ લેશે અને સાત વાગ્યે તેઓ ડિજિટલ આતશબાજી નિહાળશે. આ વખતે દિવાળી પર્વે અયોધ્યામાં 17 લાખ દિવડા પ્રગટાવવામાં આવશે. ગયા વર્ષે નવ લાખ દિવડાની જ્યોતથી અયોધ્યા રોશન થયુ હતુ. આ વર્ષે દિવડાની સંખ્યા લગભગ બમણી થઈ જશે.