કુકરમુંડાનાં ડોડવા ગામે શોર્ટ સર્કીટ કે અન્ય કોઇક કારણોસર આગ ભભુકી ઉઠતા ત્રણ ગાળાનું આખું મકાન બળીને ખાક્ થઇ જતા જીવનજરૂરીયાતની ચીજવસ્તુ, અનાજ સહિત તમામ ઘરવખરીને નુકશાન પહોંચતા પરિવારને આર્થીક નુકશાન પહોંચ્યું હતું. પરંતુ પરિવારજનો અને પશુઓને કોઈ નુકસાન થયું ન હતું.

સુત્રો પાસેથી મળતી માહિતી મુજબ, સોનગઢના ડોડવા ગામના રહીશ જાનાબેન ધારાસિંગભાઈ પાડવી અને તેમના સંતાનો ગતરોજ સવારે ઘરે હતા જ્યારે તેમના પતિ ધારાસિંગભાઈ પુખ્યાભાઈ પાડવી નિત્યક્રમ મુજબ સવારે દૂધ ભરવા ડેરીએ ગયા હતા. તે દરમિયાન શોર્ટસર્કીટ કે અન્ય કોઈક કારણોસર ઘરમાં આગ ભભુકી ઉઠી હતી જેથી ગણતરીની મિનીટોમાં આગની જવાળાઓ વિકરાળ બનતા ત્રણ ગાળાનું આખું ઘર ઝપેટમાં આવી ગયું હતું અને માતા અને પુત્રી સમયસુચકતા જાળવી ઘરની બહાર નીકળી બુમાબુમ કરી મુકતા આસપાસના રહીશો એકત્ર થઈને આગને કાબુમાં લેવા દોડધામ કરી મુકી હતી. લોકોએ પાણીથી આગ ઓલવવા પ્રયાસ કર્યો હતો. જોકે ઘરમાંની ઘરવખરી, નાણાં, ઘરેણાં, અનાજ, કપડાં, ફર્નિચર સહિત તમામ બળી જતાં પરિવારને ભારે આર્થિક નુકશાન પહોંચ્યું હતું.(ફાઈલ ફોટો)