તાપીમિત્ર ન્યુઝ,સુરત:પુણા સારોલી રોડ પર આવેલ સાલાસર ટેક્ષટાઇલ માર્કેટ અને કુબેરજી વર્લ્ડ માર્કેટમાં કાપડની દુકાન ધરાવતા વેપારીને દિલ્હી,રાજસ્થાન અને ઉત્તરપ્રદેશના ચીટરોએ રૂ.૬.૨૦ લાખનો ચુનો ચોપડ્યો હોવાનો બનાવ પ્રકાશમાં આવ્યો છે. પરવટ પાટીયાના મોડલ ટાઉન ખાતે રહેતા અનુજ મોહેતા પરિવાર સાથે રહે છે અને પુણા સારોલી રોડ પર આવેલ સાલાસર ટેક્ષટાઇલ માર્કેટ અને કુબેરજી વર્લ્ડ માર્કેટમાં કાપડની દુકાન ધરાવે છે. રાજસ્થાનના જોધપુર ખાતે રહેતા મનિષ ગેહલોત, દિલ્હીના રામકિશોર બંસલ,દિલ્હીના પંકજ દિપક શર્મા અને ઉત્તરપ્રદેશના ડેનિશ ખાન સહિત પાંચ ચીટરો વર્ષ ૨૦૧૬માં સુરત આવ્યા હતા. અને કાપડ વેપારી અનુજકુમારનો સંપર્ક કર્યો હતો. ત્યારબાદ આ ચીટરોએ વેપારીને સમયસર પૈસા આપવાની બાંહેધરી આપી તેમની પાસેથી ઉધારીમાં રૂ.૬.૨૦ લાખનો કાપડનો જથ્થો ખરીદ્યો હતો. જો કે આ ચીટરોએ સમયસર પૈસા આપવાની વાત કરવા છતાં પણ પૈસાની ચુકવણી ન કરી નાસી છુટ્યા હતા. બનાવ સંદર્ભે અનુજભાઇએ પુણા પોલીસ મથકમાં છેતરપીંડીની ફરીયાદ નોધાવી હતી. પોલીસે ગુનો નોધી તપાસ હાથ ધરી છે.