તાપીમિત્ર ન્યુઝ,સુરત:અઠવાલાઇન્સ સ્થિત નવી કોર્ટ બિલ્ડીંગ ડિસ્ટ્રીક્ટ કોર્ટ ત્રીજા માળે એડીશનલ ડિસ્ટ્રીક્ટ જજના પી.એસએ ઓફિસના લોખંડના કબાટમાં મુકેલી સોનાની ૧૦ નંગ લગડી અને ચાંદીના ૨ નંગ લગડી મળી કુલ રૂ. ૮.૪૪ લાખની મત્તા વાળી પ્લાસ્ટીકની થેલી રહસ્યમય સંજોગોમાં ગાયબ થઇ જતા ઉમરા પોલીસે ચોરીની ફરિયાદ નોંધી તપાસ હાથ ધરી છે. અઠવાલાઇન્સ સ્થિત નવી કોર્ટ બિલ્ડીંગમાં ડિસ્ટ્રીક્ટ કોર્ટ ત્રીજા માળે એડીશનલ ડિસ્ટ્રીક્ટ જજના પી.એસ તરીકે ફરજ બજાવતા દિપેશ પરેશકુમાર પારેખ અને તેની પત્ની દર્શના પારેખ પણ ડિસ્ટ્રીક્ટ એન્ડ સેશન્ટ કોર્ટમાં જ નોકરી કરે છે. પારેખ દંપતીએ તેમની બચતમાંથી ૨૦ ગ્રામ વજનની સોનાની ૧૦નંગ લગડી અને ચાંદીની ૫૦૦ ગ્રામ વજનની ૨ નંગ લગડી મળી કુલ રૂ. ૮.૪૪ લાખની મત્તાની ટુક્ડે-ટુક્ડે ખરીદી કરી હતી. ઉપરોક્ત સોના-ચાંદીના લગડી પાર્લેપોઇન્ટની સ્ટેટ બેંક ઓફ ઇન્ડિયા શાખામાં નવું લોકર ખોલાવી મુકવાની હોવાથી ગત તા. ૧ ફેબ્રુઆરીના રોજ ઘરેથી પ્લાસ્ટીકની થેલીમાં લઇ આવ્યો હતો અને દિપેશે પોતાની ઓફિસના લોખંડના કબાટમાં થેલી મુકી દીધી હતી. ત્યાર બાદ સમયાંતરે દિપેશ થેલી ચેક કરતો હતો. દરમ્યાનમાં તા.૨૫ ફેબ્રુઆરીના રોજ દિપેશ મિત્રને મુકવા રેલવે સ્ટેશન ગયો હતો જયાં કબાટની ચાવી સાથે મોટરસાઇકલની ચાવી ખોવાય ગઇ હતી. જેની જાણ દિપશે કોર્ટના નાઝર ઓફિસના કલાર્કને જાણ કરી હતી. કલાર્ક સોનીભાઇએ ડુપ્લીકેટ ચાવી બનાવવા વાળા હિમ્મત કે. પંચાલને બોલાવ્યો હતો અને સ્ટેનોગ્રાફર એ.ટી. ખારવાની હાજરીમાં કબાટનું લોક ખોલી નવુ લોક લગાવ્યું હતું અને બે ચાવી આપી હતી. જે પૈકી એક ચાવી કબાટમાં જ હતી પરંતુ ત્યાર બાદ સોના-ચાંદીની લગડી વાળી પ્લાસ્ટીકની થેલી કબાટમાંથી રહસ્યમય સંજોગોમાં ગુમ થઇ ગઇ હતી. જેથી દિપેશે રૂ. ૮.૪૪ લાખની મત્તાની લગડી મુકેલી થેલીની શોધી હતી અને ચાવી બનાવવા વાળા હિમ્મત પંચાલના ઘરે જઇ પણ તપાસ કરી હતી. પરંતુ લગડી વાળી થેલીનો ક્યાંય પત્તો નહિ મળતા છેવટે આ અંગે આજ રોજ ઉમરા પોલીસ મથકમાં ફરિયાદ નોંધાવી હતી.