તાપીમિત્ર ન્યુઝ,સુરત:પુણા રેશ્મા રો હાઉસ પાસેના ઓવર બ્રિજ પરથી દંપતિ બાઇક પર જઇ રહ્યું હતુ. ત્યારે પાછળથી ત્રાટકેલા સ્નેચરોએ પરિણીતાના ગળામાં ઝાપટ મારી રૂ.૧૮ હજારની સોનાની ચેઇન આંચકી ધુમ સ્ટાઇલમાં નાસી છુટ્યા હતા. ભાવનગર જીલ્લાના તળાજા તાલુકાના સેરાવદર ગામના વતની અને હાલ વરાછા એલ.એચ.રોડ વર્ષા સોસાયટીમાં રહેતો હરેશભાઇ ઝીંઝાળા નોકરી કરી પરિવારનું ગુજરાન ચલાવે છે. તેમની પત્ની તલ્લુ બેન તા.૧લી ડિસેમ્બરના રોજ રાત્રિના સમયે પોતાના પતિ સાથે બાઇક પર બેસી પુણા રેશ્મા રો હાઉસ પાસેના બ્રિજ પરથી પસાર થઇ રહ્યા હતા. ત્યારે બાઇક પર ત્રાટકેલા બે સ્નેચરોએ તલ્લુબેનને ટારગેટ કરી ગળામાં ઝાપટ મારી રૂ.૧૮ હજારની સોનાની ચેઇન આંચકી અંધારાનો લાભ લઇ બાઇક પર રફુચક્કર થઇ ગયા હતા. આ બનાવ સંદર્ભે તલ્લુબેને પુણા પોલીસ મથકમાં ફરીયાદ નોધાવી હતી. પોલીસે ગુનો નોધી તપાસ હાથ ધરી છે.