તાપીમિત્ર ન્યુઝ,સુરત:ભાઠેના ચાર રસ્તા પાસે બાંધકામ કોન્ટ્રાકટરને તમારી કારમાંથી ઓઇલ ટપકે છે એમ કહી કાર ઉભી રખાવી ધ્યાન ભટકાવી ગઠિયાઓ કારમાંથી રૂ. ૩૫ હજારની કિંમતનું લેપટોપ તફડાવી ભાગી ગયા હોવાની ફરીયાદ પોલીસ મથકમાં નોંધાઇ છે. અલથાણ-ભીમરાડ કેનાલ રોડ સ્થિત નેસ્ટ ઓર્ચીડ ટાવરમાં રહેતા બાંધકામ કોન્ટ્રાકટર તેજશ જમનાદાસ જસાણી ગત રોજ સાડા દસ વાગ્યાના અરસામાં મારૂતિ ડિઝાયર કાર નંબર જીજે-૦૫-આરએ-૫૨૭૨ લઇ બાંધકામ સાઇટ જોવા નીકળ્યા હતા. દરમ્યાનમાં ઉધના - મગદલ્લા રોડ રોકડીયા હનુમાન મંદિર થઇ ભાઠેના ચાર રસ્તા પાસે પહોંચ્યા હતા. ત્યારે એક મોટરસાઇકલ સવાર યુવાને ચાલુ કાર નજીક આવી તમારી કારમાંથી ઓઇલ ટપકે છે એમ કહ્યું હતું. જેથી તેજશે પોતાની કાર ભાઠેના બીઆરટીએસ જંકશન પાસે ઉભી રાખી હતી અને કયાંથી ઓઇલ ટપકે છે તે જોવા કારમાંથી નીચે ઉતર્યા હતા. આ દરમ્યાનમાં ગઠિયાઓ અત્યંત ચાલાકી પૂર્વક કારમાંથી ડેલ કંપનીનું લેપટોપ કિંમત રૂ.૩૫ હજારની મત્તાનું તફડાવીને ભાગી ગયા હતા. ઘટના અંગે બાંધકામ કોન્ટ્રાકટરે સલાબતપુરા પોલીસ મથકમાં ફરિયાદ નોંધાવતા પોલીસે તપાસ હાથ ધરી છે. પોલીસે ગુનો નોંધી આરોપીઓને પકડવા ચક્રોગતિમાન કર્યા છે.