તાપીમિત્ર ન્યુઝ,સુરત: વરાછા ઘનશ્યામનગરમાં આવેલા એક હિરાના કારખાનામાં રાત્રિના સમયે તસ્કરો ત્રાટકયા હતા. લોખંડની ગ્રીલ તોડી અંદર પ્રવેશ કર્યો હતો. ત્યારબાદ કારખાનામાંથી રૂ.૪.૧૪ લાખના તૈયાર હિરા ચોરી કરી ભાગી છુટ્યા હતા. જોકે સીસીટીવી કેમેરામાં એક તસ્કરના ફુટેજ કેદ થયા હતા. રાજસ્થાન નાંગોર જીલ્લાના ખીવેસર ધિગસરા ગામના વતની અને હાલ વરાછા એલ.એચ. રોડ શ્રીજી કોમ્પલેક્ષ સહજાનંદ સોસાયટીમાં રહેતા નાથુરામ નિયાલેરામ મૈહરીયા વરાછા ઘનશ્યામ નગરમાં હિરાનું કારખાનું ધરાવે છે. તા. ૨૫મી ઓકટોબરના રોજ નાથુરામનું હિરાનું કારખાનું રાત્રિના સમયે બંધ હતુ. ત્યારે તસ્કરો ત્રાટકયા હતા. તસ્કરોએ કારખાનાની લોખંડની ગ્રીલ તોડી દરવાજાનું તાળું તોડી અંદર પ્રવેશ કર્યો હતો. ત્યારબાદ ઓફીસના ટેબલના ડ્રોવરમાં રાખેલા કાચા અને પાકા હિરા મળી કુલ રૂ.૪.૧૪ લાખના હિરા ચોરી કરી ભાગી છુટ્યા હતા. આ અંગે બીજા દિવસે નાથુરામભાઇ કારખાને આવ્યા બાદ ચોરી અંગેની જાણ થઇ હતી. તાત્કાલ વરાછા પોલીસને જાણ કરતાં પોલીસ કાફલો દોડી આવ્યો હતો. પોલીસે તપાસ કર્યા બાદ કારખાનામાં લાગેલા સીસીટીવી કેમેરા ચેક કરતા એક તસ્કરના ફુટેજ મળી આવ્યો હતો. પોલીસે નાથુરામભાઇની ફરીયાદના આધારે ગુનો નોધી આરોપીઓને પકડવા ચક્રોગતિમાન કર્યા છે.