ધરમપુરના બારોલીયાથી ચાંદલા વીધી પતાવી ઘરે પરત ફરી રહેલ વાંસદાનાં સરા ગામનાં યુવકની બાઈક આસુરા ગામે સ્લીપ થઈ ગઈ હતી જેથી તેને ઈજા થતા વલસાડ સિવિલ હોસ્પિટલમાં ખસેડાયો હતો. જ્યાં એક માસની સારવાર બાદ તેનું મોત નિપજ્યું હતું જે બાબતની ફરિયાદ ધરમપુર પોલીસ મથકમાં નોંધવામાં આવી હતી.

સૂત્રો પાસેથી મળતી માહિતી મુજબ, વાંસદા તાલુકાનાં સરા ગામનાં કમદિ ફળિયામાં રહેતા વિકેશભાઇ રમેશભાઈ કુકણા ગત તારીખ 07/04/2019નાં રોજ પોતાની બાઈક નંબર GJ/30/B/7181 લઈને મિત્ર સાથે ધરમપુરનાં બારોલીયા ગામે ચાંદલા વિધિમાં આવ્યા હતા જ્યાં ચાંદલાવિધી પૂર્ણ થયા બાદ તેઓ ધરમપુર વાંસદા માર્ગે આસુરા વાવ ચોકડી હનુમાન મંદિર પાસેથી પસાર થઈ રહ્યા હતા જે દરમિયાન વિકેશભાઈએ બાઈકનાં હેન્ડલ પરથી કાબુ ગુમાવી દેતા તેની બાઈક સ્લીપ થઈ ગઈ હતી આ અકસ્માતમાં વિકેશભાઈને માથાનાં ભાગે ગંભીર ઈજા પહોંચી હતી જ્યારે વિકેશની પાછળ સવાર મિત્રને નજીવી ઇજા પહોંચી હતી. ગંભીર રીતે ઇજાગ્રસ્ત વિકેશને પ્રથમ નજીકની હોસ્પિટલમાં સારવાર અર્થે લઈ ગયા બાદ વધુ સારવાર અર્થે વલસાડ સિવિલ હોસ્પિટલમાં ખસેડવામાં આવ્યો હતો જ્યાં એક માસની સારવાર બાદ તેનું મોત નીપજ્યું હતું.